Aizawl district-ah thla 5 chhungin Tualthah thubuai pathum a awm

Aizawl district-a police hotute chuan nimin khan Aizawl SP pisa conference hall-ah crime review meeting an nei a, Aizawl district chhunga thil sual tihna thlengte dinhmun an thlirho. Kumin January-May thla chhungin Aizawl district-ah tualthahna ṭum thum a thleng.

Crime review meeting hi Aizawl SP Lalhuliana Fanai chuan, police-te chu an hna rinawm leh taima taka thawk tura fuihin, social network hmang suala mi tichî-âi thei thil post chingte vil uluk leh zual turin a chah a; mi in rawk tihluartu chu mi thil rûk sa lei chíng an awm vang a nih thu sawiin, eng bungrua pawh, rûk a ni tih rinhlelhawm reng reng chu lei lo turin mipuite a chah bawk.

Meeting-ah hian Aizawl district-a thubuai chinfel loh la awm mek 407-tea hmalak zel dan tur sawiho a ni a, chung zingah chuan thubuai lian leh harsa zual 25 a awm. Aizawl district-ah hian kumin chhungin police-te'n ILP ṭum 25 an endik tawh a, chungah chuan dan bawhchhia mi 334 man niin, chung zinga mi 309 chu Court thutlukna angin an ramah thawn haw an ni.

Review meeting-a an tarlan danin, January-May thla chhungin kum 2015-ah aiin kum 2016-ah thubuai ziah luh a tam zawk. Janua-ry-May 2016 chhungin tualthah thubuai pathum a awm a, January-May 2015-a tual-thah thubuai panga aiin a tlem zawk. Kum 2016-ah pawngsual thubuai pathum a awm a, POCSO Act hnuaia thu-buai ziah luh 27 a awm bawk.

Kum 2015 leh 2016 khaikhinna

# Thubuai 2015 2016

1. Tualthah 5 3

2. Mi rawk 133 180

3. Rûkrûk 177 221

4. Pawngsual 3 1

5. POCSO Act 12 27

6. Ruihhlo 6 10

7. MLTP/MLPC 10 9