Belhchian dâwl lo chhuahah AH&Vety puh

MPC ṭhalaite chuan, AH&Vety depart-ment-in June 17, 2016-a thuchhuah siama NLUP hnuaia bawng inpek leh bawng vulhtute harsatna an sawifiah chu thu belhchian dawl lo niin an tarlang.

Nimina MPCY thuchhuah chuan, "AH&Vety department-in bawng vulh-tute manganna leh harsatna ngaihsakna leh buaipui tumna lam aia a mawhphurtu AH&Vety minister C Ngunlianchunga leh a laina hnai Dr Lawmsanga ten bawng vulhtute dikna leh chanvo an rahbehsak hliahkhuh nan leh thup mawi nana insawifiahna thu belhchian dâwl lo an tarlan hi demawm kan ti tak zet," a ti.

MPCY chuan, "Bawng vulhtute dinhmun hriatthiamsak a, an phû tâwk chhawmdawlna tihsak tur an nih lai a, a chhuanchhe zawnga vanduaina tâwk bawng vulhtute an chungtlakna hi engti kawng mahin kan hrethiam dawn lo," an ti a; AH&Vety Minister leh Dr Lawmsanga te chu bawng vulhtute chanvo tur tihbawrhbânsakah puhin, a rang thei ang bera báng turin an phût.

MPC ṭhalaite chuan, NLUP hnuai-a bawng dawngtute enkawla vil rengtu, Lalberema chu pawisawina nei lo a ni chungin AH&Vety minister-in a hmaiphih nan Khawlian-ah a sawn niin an sawi. Minister thil tih dan chu âwm lo an tih thu sawiin, "Minister hian kut hnathawktute hmakhua a ngaih lohzia a tihlanna kan ngai a, a rang thei ang bera transfer order sût turin kan phût a ni," an ti.