Thingtlang hmasawnna tura hmalakna thlir lêt

Rural Development department chuan, nimin khan ni hnih awh tur thingtlang hmasawnna tura an hmalakna chi hrang hrangte thir lêtna Aijal Club-ah an buatsaih a, RD minister R Lalzirliana'n a hmanpui.

R Lalzirliana chuan, "Deptartment ho-tute'n thingtlang mite dinhmun châwikân leh tihhmasawnna tura ruahmanna chi hrang hrang an neihte kalpui a nih dan thlirho a, hma lam kan pan theihna tur atana kawng ṭangkai tur dap tura ruahmanna ṭha tak an siam hi thil lawmawm leh chhinchhiahtlak a ni," a ti a; official-te chu zirhona leh sawihona an neih hunah Mizoram hmasawnna tur thil dah pawimawh hmasa ber turin a chah.

RD secretary Lal-hmingthanga chuan, RD department chu thingtlang hmasawnna tur kawnga hna thawk nasa ber a ni thu sawiin, "Sorkar lai-puiin mawhphurhna tam tak a pe a, an duhtuiin min vil uluk sâwt hle. Keini pawhin hna kan thawhnaah fimkhur tak leh uluk taka kan thawh a ngai lehzual tawh a, tun dinhmunah Mizoram hi India ram state hrang hrangte zingah rural scheme kalpui ṭhate zinga chhiar a la ni," a ti.

Review meeting-ah hian centrally sponsored scheme chi hrang hrang - MGNREGS, IAY, BADP, IWMP, SRLM, SAU, etc. kaltlanga state, district leh block level-a hmalak tawh-nate leh hmalak chhun-zawm dan tur sawiho a ni.