Hnathawk ṭha turin contractor chah

Parliamentary secretary Hmingdailova Khiangte chuan, nimin khan Kawnpui leh Hor-toki inkar kawng siam mek a tlawh a, contractor chu ṭha taka hna thawk turin a chah.

Thu dawn danin, Kawnpui leh Hortoki inkar kawng siamna atan hian Mizoram sorkarin cheng nuai 100 a ruahman a, April 2016-a zawh tura tih a ni. Mahse, October 2015 aṭanga March 2016 chhungin hna thawh mumal a awm lo a, chu vang chuan kawng hi tun din-hmunah chuan a la chhe hle.

Kawng hi Railways-in an dil angin Mizoram PWD chuan rél chawlhhmun panna kawng atan hman an phalsak a, Railways hian kawng siam hna pawh an thawk a, an thawh chin bak chu Mizoram sorkar sum hmangin contractor siamtir a ni.

Parliamentary Se-cretary hian Mizoram sorkar sum hmanga kawng siam hna a muan avangin kawng siamna hmun hi a tlawh a, "Kawng siam hna a muan avang hian rél kawng siamtu leh Hortoki mipuite'n harsatna an tâwk a, sorkar tan thil zahthlak leh hrehawm tak a ni," a ti.

Railways hotute chuan kalkawng a ṭhat chuan rel kawng an siam mekah harsatna a awm lo thu Hmingdailova hi an hrilh a, "Kawng a ṭhat chuan hmanrua phurh luh zung zung theih a ni. Dan leh thupek lamah pawh district thuneitute'n min vil ngun a, a chhehvel mipuite pawhin mi ṭawi-mawm ṭha," an ti a, tluang taka hna an thawh theih reng thu an sawi.