Rangkachak tawlhrûk thubuai Customs-in chhui ngaihna an hre rih lo
Customs department hotute chuan, December 14, 2015 zana Aizawl dái, Zampuimanga lungphun bula rangkachak tam tham tak tawlhrûk suam chungchang chu chhui vak ngaihna an hre lo a, chhui tura Mizoram police aṭanga lehkha an hmuh pawh chhangin, chhui vak theih an neih loh thu an hriattir tawh.
Vanglaini palai zawhna chhangin Aizawla Customs department hotute chuan, nikum December 14 zana rangkachak tawlhrûk suamah, rangkachak tawlhruk chungchang bik chhui tura ngenna Mizoram police aṭangin an dawng ngei tih an sawi a; mahse, finfiahna an neih loh avangin chhui theih vak an nei lo tih police-te an hriattir a ni.
Customs hotute chuan, rang-kachak tawlhrûk chu nikum lama thil thleng tawh a ni a, kumin April thlaah hriat chhuah chauh a nih avangin chhui a harsa tawh hle tih an sawi a, "Finfiahna kan nei lo a, khawiah nge rangkachak a awm hriat a ni lo a, chhui vak ngaihna kan hre lo," an ti.
Rangkachak tawlhrûk zinga eng emawzat tal hmuh tur awm se chuan chhui zui a theih tur thu sawiin, Customs hotute chuan, "Finfiahna awm lo chuan chhui thei kan ni lo a, rinhlelhte thu zawtfiah vak thei kan ni lo, danin a phal lo," an ti a; rangkachak tawlhrûk chungchang bik chu police tan chhui a awlsam zawk tura an ngaih thu an sawi.
Rangkachak tawlhrûk chung-changah hian Home minister R Lalzirliana'n May 11, 2016-a a pisa-a press conference a neihah zawhna chhangin, police hotute chuan, rangkachak tawlhrûk chu Customs ho buaipui tur a nih thu leh, buaipui turin ziakin Customs an hrilh tawh thu a sawi a, "Police-te chuan insuamna hi kan dah pawimawh hmasa ber. Insuamna nen a inkaihhnawih tho a, a la lang chhuak mai dawn a ni," tiin an sawi a ni.
Mizorama Customs depart-ment-te hian kum liam ta, April 2015 - March 2016 chhung khan case 19 an nei a, chunga an thil man hlut zawng chu Rs. 2,01,29,723 a ni.
Kum kal mek, 2016-17 a April leh May thla chhung khan case pahnih nei tawhin, chunga an thil man hlut zawng chu Rs. 60,78,600 a ni a; June 2016 chhunga an thil man tawhte hlut zawng, cheng nuai 300 tling lo deuh nen chuan kum kal meka an thil man tawh zat hlut zawng chu cheng nuai 360 vela ngaih a ni. June thla bika an thil man tawh zat hi thla a la tâwp loh avangin record-ah ziah luh a la ni lo.
Customs department hian tun hnai khan rangkachak tam tham tak an man leh a, rangkachak chu a tak dan enfiah turin Guwahati-ah an kalpui mek a, vawiin lamah result hriat theih beisei a ni.
Kum 2015-16 a Customs case
Thla Case A hlutna
April 2015 2 Rs. 15,70,950
May 2015 3 Rs. 5,10,270
June 2015 1 Rs. 1,54,000
July 2015 1 Rs. 10,88,200
August 2015 3 Rs. 8,01,000
September 2015 1 Rs. 1,22,36,200
October 2015 1 Rs. 37,500
November 2015 1 Rs. 22,50,000
December 2015 1 Rs. 30,403
January 2016 1 Rs. 3,59,000
February 2016 1 Rs. 3,68,000
March 2016 3 Rs. 7,24,200