ASF: vawk thi 6,416, suat 12,132; Vawk phûmna turah harsatna a awm?

Vawk pùl hri, African Swine Fever (ASF) vangin nimin thleng khan Mizorama khua/veng 178-ah vawk 6,416 a thi tawh a, vawk 12,132 suat a ni tawh bawk a, a vaiin 18,548 a ni. Vawk thi vang hian khua/veng tam takin vawk phûmna hmun turah harsatna an tâwk.

AH&Vety department chhin­chhiah danin, kumin January 1 aṭanga nimin July 18 thleng khan Serchhip district-a Thenzawlah ASF vangin vawk 441 a thi tawh a, Mizorama kumina vawk thi tamna ber a ni. Serchhip district-a Chhing­chhipah vawk 1,269 suat a ni tawh a, vawk suat tamna ber a ni.

Vanglaini palaiin vawk thi tamna leh suat tamna khawtlang hruaitute a biaknaah, vawk thi phûmna hmun tur an ruahmante an hmang nasa tawh a, khawtlangin vawk thi phûm buaipuina atan sorkar aṭangin puihna an dawng lo tih an sawi.

Vawk suat tam berna Chhingchhip VC hruaitute chuan Vanglaini zawhna chhangin, ASF vanga vawk thi leh suat phûmna tur excavator (JCB)-in an laih thu leh vawk thi phurh nan khawtlang bawlhhlawh paihna lirthei an hman ṭhin thu an sawi a, "Vawk thi tam tak chu farm-a mi a ni a, a hmunah an phûm mai ṭhin. Tualchhunga vawk thi, phumna nei lote chu khaw páwn hmun remchangah phûmna tur kan ruahman," an ti.

Chhingchhip VC hruaitute chuan, khaw pawna vawk thite phûmna hmunah excavator hmangin ft. 30-40 a thui khur an laih ṭhin thu te, vawk thi awm tam dan azirin khur khah hma zawng an phûm belh zel thute an sawi a; excavator leh pick-up hman mante chu VC-in an tum thu te, vawk thi phûm erawh chu vawk neitute'n an buaipui thu leh vawk thi phûmnaah an enpui zel thute an sawi bawk.

AH&Vety chhinchhiah danin, nimin thleng khan Durtlangah vawk 900 suat a ni tawh a, kumina Mizorama vawk suat tamna ber dawttu a ni. Vanglaini zawhna chhangin Durtlang Local Council Chairman chuan, an venga vawk thi neitu, hmunhma nei lote tan LC ramah phûmna an ruahman thu te, vawk thi chu vawk neitute'n an phûm ṭhin thu te, vawk thi phûmna tura an ruahman LC ramah vawk phûmna tur laih rem deuh hmun ruak a tam tawh loh thute a sawi.

Durtlang LC Chairman chuan, an vengah Veterinary Dispensary a awm thu sawiin, "Doctor pakhat, VFA pakhat leh 4th grade pakhat an awm a, Durtlang khawthleng bakah Muthi leh Sihphirte an bial a, an indaih lo hle. Tun hma chuan doctor pathum an awm ṭhin," a ti.

Kumina ASF hri vanga vawk thi tam berna Thenzawlah chuan nimin thleng khan vawk 441 a thi tawh. Vanglaini palaiin a biak theih chinah Thenzawl East VC President chuan, vawk thi phûmna tur chu Thenzawl East leh West VC ṭang dunin thlanmual pangngaia hnam dang thite phûmna tura an zuahah an ruahman thu a sawi.

Thenzawl East VCP chuan, vawk thi phûmna hmun tura an ruahmanah hmunhma nei lote tan excavator hmangin khur an laih thu leh a laih man chu VC-in an tum vek thu a sawi a, "Mahni compound-a phûmna neite chuan an phûm a, compound nei lo an tam avangin thlanmuala phûm a tam tawh. Khur kan laih chu a khah chuan a dang kan lai leh nghal ṭhin," a ti.

Vety department tarlan danin, nimin thleng khan Aibawkah ASF vangin vawk 349 a thi tawh a, kumina Mizorama vawk thi tamna ber dawttu a ni. Aibawk VC hruaitute chuan, vawk thlânmual an siam thu Vanglaini an hrilh a, "VC-in JCB hmangin kan lai a, a phurhna leh hri darh tur laka invenna bleaching/glove-te kan lei bakah, a chángin hlawhfa kan ruai. Vawk thi vang hian kuminah VC-in Rs 1,92,000 vel kan sêng tawh," an ti a; pawisa an neih remchan loh laiin mimal pawisa an pûk ṭhin thu an sawi.

Aibawk VC hruaitute chuan, kum hmasa lamah chuan bialtu MLA aṭangin vawk thi kaihhnawiha invenna tur hmanrua an mamawhte an dawng ṭhin a, kuminah chuan an la dawn loh thu an sawi a, "Kumin January-March khan kan khuaa vawk chhiarpui kan neihah vawk 1,060 a awm a, eng emaw zat a thih tawh avangin kan buai hle," an ti.