Aikal late hna zawm hun bituk a tâwp

Mizoram sorkarin aikal late tana an hna zawm tura hun a pek chu nimin khan a tâwp. Vawiin aṭang chuan sorkar hna thawk, mahni hna zawm lote chu dan loa châwl (unauthorized absence)-ah ngaih an ni dawn a, an chungah disciplinary action lak tur a ni.

June 6, 2024-a Council of Minister ṭhukhawm chuan aikal lâk tihtawp vekna tur a pawm a; chumi bawhzui chuan DPAR Secretary chuan June 19, 2024 khan hriattirna (office memorandum) tichhuakin, aikal lâte chu hriattirna chhuah aṭanga thla khat (ni 30) ral hmain an hna zawm vek turin a hriattir. Hna chhunzawm lote chu dan loa châwl (unauthorised absence)-ah ngaih an ni dawn tih a tarlang bawk.

Aikal late chung­changah a ṭul anga hma laa bawhzui turin depart­ment/office hotute hriattir an ni a; an bawhzui dan (compliance report) pawh hriattirna chhuah aṭanga ni 45 chhungin DPAR (ARW)-ah thehlut tura tih an ni.

Damlote leh natna khirh neite chu hriat­thiamna a awm dawn a, dan angin chawlh (leave) an neih ang zawng zawng an lak phalsak a ni dawn. Damlo leh natna khirh tuarte chu medical board aṭanga 'medical cer­ti­ficate of incapacity’ laa thehlut tura chah an ni a, an dinhmun azir­in ngaih­­hnathiamna (spe­cial consideration) pek theih a ni.

Aikal la mek, an hna thawk chhunzawm thei lo leh duh lote tan CCS (Pension) Rules, 1972 angin voluntary retire­ment, invalid pension leh compulsory retirement-te dil leh pek theih a ni dawn a; dan awm sa anga châwl thei lote tan Special Voluntary Retirement Scheme siam tum a ni bawk.

Sorkar hnathawk aikal late ni 30 chhunga an hna chhunzawm tura hriattirna hian Mizoram sorkar hnuaia thawk zawng zawng - regular employee, co-terminus (CSS), part-time, casual, work-charged, con­tract leh provisional em­ployee-te a huam vek a ni.

Tarlan tawh angin, Mizoram sorkar chuan aikal la zingah ngaih­hnathiam bik a nei dawn lo a, an hna zawm thei lo leh zawm duh tawh lote chu an tana sorkarin ruahmanna a siam angin an hna aṭanga an bàn a ngai dawn a ni.