Zirna lehkha lem hmang lakah Health dept.-in FIR thehluh tum

Health department chuan National Health Mission (NHM) hnuaia dental surgeon hna thawk ṭhin, zirna lama lehkha pawi­mawh (document) lem a hman vanga báng ta Christina Lalṭhazuali, Dinthar, Aizawl lakah police-ah first information report (FIR) thehlut an tum.

Health department hotute hnen aṭanga Vanglaini thu dawn danin, document lem hman chungchang hi an ngai thutak a, ngawih­bopui chi-ah an ngai lo. Christina Lalṭhazuali laka FIR thehlut turin an inbuatsaih a, file kal kualtir a ni a, Health & family Welfare Secretary-in FIR thehlut turin a pawmpui tawh.

Hetih lai hian, nimin thleng khan FIR thehluh a la ni lo a; FIR thehluh hun tur leh thehluhna hmun turte hriat theih a la ni lo.

MZP chuan, NHM hnuaia February 23, 2023-a dental surgeon lak zingah document lem hmang an awm tih hriain, Health Minister hnenah hma la turin an ngen a ni. Christina Lalṭhazuali hian June 5, 2024 khan NHM-ah bànna a thehlut a, a tûkah thuneitute'n an pawmsak nghal.

Christina Lalṭhazuali hi dental surgeon anga NHM hnuaia a thawh chhungin Thenzawl PHC leh Kawnpui PHC-ahte a thawk ṭhin a ni.