Pineapple Bonanza buatsaih

Nimin khan Millennium Centre kawtah Tuichangral Organic Farmer Producer Company Ltd. lakhuihthei thar zawrh rûnpui, Pineapple Bonanza buatsaih a ni a, Agriculture & Farmer Welfare minister PC Vanlalruata'n a hawng.

Pineapple Bonanza hi Mission Organic Mizoram (MOM) leh Clover Organic Pvt. Ltd.-te hmalakna 'Mission Organic Value Chain Development for North Eastern Region (MOVCD- NER)' kaltlanga Khawzawl district-a lakhuihthei chíngtu intelkhawm Tuichangral Organic Farmer Producer Company Ltd. buatsaih a ni.

Bonanza hi August 2022 khan neih ṭan niin, kumin hi a ṭum thumna a ni a, July 26, 2024 thleng a awh ang. Bonanza chhungin lakhuihthei metric ton 8 vel hralh an inbeisei.

Minister PC Vanlalruata chuan, farmer producer company (FPC) hnuaiah kut hnathawktu 500 tal awm tura ruahman a nih thu sawiin, Tuichangral FPC-in chak taka hma an la chu chhuanawm a tih thu a sawi a; "MOM kaltlangin tuna hmalak mekna Mizo hmarcha, sawhthing, aieng, thingpui fê leh lakhuihthei zingah Mizoram thar sapthei chu a danglam bik avang leh India ramah chíng an tam loh avangin Chief Minister duh danin MOM hnuaia hmalakna turin telh belh tum a ni," a ti.

PC Vanlalruata chuan, Mizoram Agriculture & Allied Marketing Board kalpui mek a nih thu te, MOM hlawhtlin theih nana Agriculture & Farmer Welfare department hotute leh thawktu dangte bakah, FPC enkawltu Clover Organic leh service provider-te hmalakna chhuanawm a tih thute a sawi a; organic thlai ngaisanga ei tam turin mipui a chah.

Mizoramah FPC 30 ziah luh a ni tawh a, FPC tin hian thlai thlan bik - Mizo hmarcha tê, sawhthing, aieng, thingpuife leh lakhuihtheiahte hma an la a ni.

Tuichangral Organic Farmer Producer Com-pany hi MOVCD-NER hnuaia FPC a ni a, August 16, 2021 khan MOVCD-NER Phase-III hnuaiah din niin, Khawzawl district-a khaw pariat - Chalrang, New Chalrang, Vangtlang, Khawhai, Sialhawk, Tlangmawi, Tlangpui leh Lungtan aṭangin lakhuihthei chingtu mi 500 an tel.