Union Minister-in CVScAH a tlawh

Sorkar laipuia Agri­culture and Farmers Welfare minister of state Bhagirath Choudhary chuan nimin khan Central Agricultural Univer­sity hnuaia College of Veterinary Sciences & Animal Husbandry (CVScAH), Selesih a tlawh a; loneitute leh ran vulhtute ngaih pawimawh tur an nih thu a sawi.

Bhagirath Choudhary chuan, loneitute leh ran vulhtute chu ngaih pawimawh tur an nih thu sawiin, "Kum 2029-ah chuan an thla tin lak luh hi a lêt lia pung tura hmalakna kalpui mek a ni a, an thlai leh sa thar chhuahte hralhna kan ngai pawimawh tur a ni. Farmers Producers Organisation (FPO) hi thu mai ni lo, a taka kalpui tur a ni," a ti.

Union Minister hian CVScAH-a Teaching Veterinary Clinical Complex (TVCC) leh Department of Veterinary Microbiology a tlawh a, CVScAH sales booth leh silver jubilee monument-te a hawng.

Bhagirath Choudhary chuan CVScAH community hall-a exhibition buatsaih a tlawh a; College dean Prof. Lalnuntluangi Hmar kaihhruaiin loneitute leh ran vulhtute a kâwm bawk.

Union Minister lo zin hi Lengpui Airport-ah Mizoram Agriculture and Farmers Welfare minister PC Vanlalruata leh secretary Ramdinliani te bakah, department hotu dangte'n an lo dawng­sawng a; nizan khan Aizawlah a riak a, vawiinah New Delhi a pan ang.