Vairengte-Sairang kawng chungchangah Governor-in inrem turin dept. pahnih a chah

Governor Dr Hari Babu Kambhampati chuan, Vairengte leh Sairang kawngpui thlûr lia laih turah hna thawh theih a la ni lo chu pawi a tih thu sawiin, Mizoram sorkar department pahnih inkara harsatnate chingfel turin department pahnih hotute'n theihtawp chhuah se a duh thu a sawi.

He thu hi Governor hian nimin khan National Highways & Infrastructure Development Corporation Limited (NHIDCL) Regional Office, Aizawl hotute Raj Bhavan-a a kawmnaah a sawi a ni.

NHIDCL hotute chuan, Vairengte-Sairang leh hmun danga hna thawh theih a nih loh chhante an sawifiah a; hmun ṭhenkhatah mimal hmalakna leh dodalna avanga hna a khaihlak ṭhin thu te, kawng laihna tur ruahmanah Mizoram sorkara department pahnih inremsiam thei lo chu tuna an harsatna lian ber a nih thu an sawi.

Governor chuan, Vairengte-Sairang kawngpui chu Mizoram tana nunna hnár tia chhàl theih a nih thu sawiin, thlûr lia siam hna thawh theih loh tawpa a awm chu pawi a tih thu a sawi a, "He kawngpui hi a tlang rual rualin Mizoramah ni tina khawsakna atan sum sen nasa takin a tlem phah dawn a, Mizoramah hmasawnna kawng hrang hrangin a thlen thei dawn a ni. A rang lama hna thawh theih a pawimawh a, department pahnihte pawh an inkara chinfel tur awmte chinfel tumin theihtawp an chhuah a ngai a ni," a ti.

Dr Hari Babu Kambhampati chuan, NHIDCL hotute chu beidawng lo a, Mizoram tana hmasawnna ruhrel pawimawh hmasa NH kawngpui zauh leh siam hna thawh a nih theih nan, an harsatna tawh chu chinfel dan zawng chhunzawm zel turin a chah a; sorkar laipui lamah a theih dana ûm zui a tum thu a sawi.

Inkawmnaah hian NHIDCL executive director (project) Virender Jokhar, senior manager (projects) Dhairya Vaibhav leh hotu dangte an tel a; Mizorama hmun pariata national highway siam hna an neihte Governor an hrilhfiah a ni.

NHIDCL HOTUTE TARLAN
* NHIDCL-in Mizoramah project 8 a thawk mek.
* Dulte-Champhai (NH-6) zawh a ni tawh.
* Seling-Dulte (NH-6) chu 95% zawh tawh a ni.
* Aizawl-Tuipang (NH-54) chu 91% zawh a ni tawh a, December 2024-ah zawh an inbeisei.
* Lunglei-Tlabung (NH-302) 43% zawh a ni tawh
* Keifang-Tuival (NH-102B) chu 56% zawh a ni tawh a, June 2025-ah zawh an tum.
* Zorinpui-Longmasu (NH-502A) chu February 2023-ah thawh tura peih ni mah se, land acquisition leh forest clearance fel lo vangin an la thawk thei lo.
* Vairengte-Sairang (NH-306 & 6) thlûr lia siam tur chu ram lak a fel thei lo a, hna an la ṭan lo.
* Aizawl Bypass (NH-6) Sairang leh Aizawl inkalpawhna tur pawh kawng laihna tur ram a la fel thei lo.