Darlak-Tuidam kawng chungchangah Mamit MJA leh Mamit SP an inkâwm

MJA, Mamit district member-te leh Mamit SP Lalthangpuii Pulamte chu Dárlâk leh Tuidam inkar kawnga harsatna awm chungchangah nimin khan SP pisaah an inkâwm.

Mamit MJA hruaitute chuan, Mamit SP-in Darlak leh Tuidam inkar kawng chhiat vanga mihring leh lirtheite himna tura lirthei tlan dan tur ruahmanna a siam, July 1, 2024-a thupek a chhuah chuan zawm a hlawh tâwk lo niin an hria a; thupek zawm a nih ngei theih nan hmalak dan tur an sawiho a ni.

Lirthei kal dan tura ruahmanna ding mek - zing dar 5 aṭanga chawhnu dar 2 thleng Tuidam aṭanga Darlak pana tlan leh, tlai dar 3 aṭanga a tuk zing dar 4 thleng Darlak aṭanga Tuidam lam pana tlan theih tih chu mipuiin an zâwm ṭha lo a, kawng lakah harsatna a thlen nasa tih MJA hruaitute chuan sawiin, duty detailment siam turin Mamit SP an ngen.

Lalthangpuii Pulamte chuan, harsatna chu an hriat thu leh nimin (Ningani) zing dar 5 aṭangin duty an dah thu Mamit MJA-te a hrilh a; tuna an kawng hawn chuan awmzia a nei tam lo anih chuan ruahmanna dang siam leh theih a nih thu a sawi.

Darlak leh Tuidam kawng hi Langkaih balu phurhna kawng pui ber a nih vangin fimkhur a ngai a, SP thupek chu zawm a nih leh nih loh vil zui tur duty dah a nih loh avangin mipuiin an zâwm ṭha lo a; khualzin tan harsatna a thlen nasat phah tih Mamit MJA-te chuan an sawi a ni.