Aizawl-Lamka inkarah helicopter thlawhtir ṭan leh tawh a ni dawn

Lamka (Chura-chandpur), Manipur leh Aizawl inkarah helicopter thlawhtir ṭan leh a ni dawn a; vawiin aṭangin Thawh-ṭanni leh Zirtawpniah a thlâwk ṭhin ang.

Thu dawn danin, September 27, 2023 aṭang khan Lamka-Aizawl inkarah helicopter a thlawk ṭhin a, Manipur sorkar chuan June 27, 2024 khan a titawp. Helicopter thlawhtir leh tura hriattirna Manipur sorkar aṭangin Mizoram sorkar chuan a dawng tawh a, vawiin aṭanga thlawhtir tum a ni. Chawlhkar khatah vawi hnih thlawhtir a ni dawn a; tun hman chuan chawlhkar khatah vawi khat a thlawk ṭhin.

Ruahman dan chuan, helicopter chu Thawhṭanni leh Zirtawpniah a thlâwk ṭhin dawn a; Aizawlah chuan Mualpui aṭanga thlawk chhuakin, Lengpui Airport a tlawh phawt ang a, chumi hnuah Lamka an pan ang. Lamka aṭang chuan Mualpuiah a ṭum ṭhin dawn a ni.

Lamka-Aizawl heli-copter chuan man (fare) chu Rs 4,500 a ni a, Aizawl-Lamka chuan man chu Rs 6,000 a ni thung.

Helicopter ticket chu Lamka-ah T Khaiminlal Haokip, BO, SDC (phone no. 8837420509), Lianzapau Samte, office assistant, DC office (phone no. 8974452664)-ahte ngaihven tur a ni a; Aizawlah chuan C Lalrinfeli i/c helicopter service (phone no. 9862374153)-ah book theih a ni.