Minister-in TRC Graduation Day hmanpui

T Romana College chuan nimin khan Vanapa Hall-ah 'Fresher's Social cum Graduation Day' an hmang a, minister C Lalsawivunga'n a hmanpui. Minister chuan, degree neih ringawt a tâwk lo a, thiamna tak tak neih a ngaih thu a sawi.

C Lalsawivunga chuan, chhungkaw tan leh ram tan tia taimakna leh tumruhna nen beih a ngai tih sawiin, "College aṭanga pass leh degree neih ringawt a tâwk tawh lo a, thiamna tak tak kan neih a hun tawh. Mizoramin direct recruit IAS, IPS leh central service dang kan nei thei tawh lohte hi a veiawm tak zet a ni," a ti.

College zirlaite chu hlawhtlin an duh tak tak chuan Pathian ṭihna nen taimakna, tumruhna leh thawhrimna nei turin Minister chuan a chah a, "Mahni tan leh Mizoram tan kan beih a ngai. Zu, ruihhlo leh mipat hmeichhiatna hman khawlohna kawng zawh lo turin Pathian ṭihna nen hun hmang u la, in nungchangte hian in nu leh pate bakah Mizoram hi chawimawi rawh se," a ti bawk.

Minister hian T Romana College annual magazine 'Raltiang' a tlangzarh a, zirlai ti ṭha 17 hnenah incentive cash award a sem. GTRC Library atan MLA fund aṭangin Rs 5,00,000 a pek tur thu a sawi bawk.