KHAWTHLIR

NITI Aayog ṭhutkhawm thlir

Chief minister Lalduhoma hoin nimin khan CMO conference hall-ah kar leha New Delhi-a neih tur NITI Aayog Governing Council atana inbuatsaihna ṭhutkhawm neih a ni. NITI Aayog hi Union Cabinet-in kum 2015 khan a din a, Prime Minister chu chairman niin, state leh union territory tina chief minister-te chu member an ni. NITI Aayog bultum hian kum 2047 hmaa ram changkang (developed country)-a India ram hlankai tumna 'Viksit Bharat 2047' kalpui mek a ni.

Kuhva ip 2,000 vel thel a ni tawh

Cooperation department kaltlanga Darlak Cooperative Society tana siam kuhva skop-na hmangin kuhva rah ip 2,000 vel thel (skop) a ni tawh a, a zatve vel hralh a ni tawh. Sorkar thuchhuah tarlan danin, kuhva rah ip khat Rs 1,200-in an lei a, an skop hnuah ip khat Rs 4,200-in an hralh leh ṭhin. Darlak Cooperative Society kuhva shop-na hmun hi July 17, Nilaini khan Mamit district cooperative officer Lalthangfala'n a tlawh a ni.

ASF inzirtir

AH&Vety department leh National Livestock Mission (NLM) chuan nimin khan Siahaa MADC Farmers' Training Hall-ah Awareness Campaign on African Swine Fever (ASF) cum Training of Farmers an buatsaih. District Vety officer Dr H Lalzarliana'n thil pawimawhte a sawifiah a, sorkar department hotu te, tlawmngai pawl, VC leh Butchers Association hruaitute leh chanchinbumite an tel.

Airport enfiah

Lengpui Airport kal zel dan tur ngaihtuahtu Working Committee chuan nimin khan an chairman TBC Lalvenchhunga, adviser to chief minister hoin Lengpui Airport-a hmun pawimawhte an tlawh a, hmalak zel dan tur an sawiho. Working Committee hian July 31, 2024 ral hmain Mizoram sorkarah Lengpui Airport kal zel dan tura rawtna (recommendation) an neihte an thehluh a ngai a ni.