Mizorama kuhva tawlhrûk dan chhui turin HC-in CBI a hriattir

Gauhati High Court Aizawl Bench chuan, khawchhak lam ram dang aṭanga dan loa Mizorama kuhva rah tawlhrûk chungchang chhui turin Central Bureau of Investigation (CBI) a hriattir.

Ram dang kuhva rah Mizorama dan loa tawlh chungchangah hian Vanramchhuangi, Chaltlang chuan December 29, 2021 khan Champhai Police Station-ah first information report (FIR) a thehlut a; chumi hnuah April 29, 2022 khan Gauhati High Court Aizawl Bench-ah public interest litigation (PIL) a thehlut leh bawk.

Gauhati HC order-a a lan danin, PIL thehluttu chuan kuhva tawlhrukin Mizorama kuhva chingte tan harsatna a thlen nasa thu te, kuhva tawlh rutute'n sorkarah chhiah an pek mang loh thu te, kuhva tawlhruk chu tihtawp a ṭul thute a tarlang. Kuhva tawlhruk titawp tura sorkarin hma a lak ṭhat loh avang leh a chhui zui ṭhat loh avangin CBI chhuitir turin High Court a ngen a ni.

Gauhati High Court judge pahnih - Justice Michael Zothankhuma leh Justice Marli Vankung te chuan thubuai hi July 16, 2024 khan ngaihtuahin, thutlukna (judgement order) an siam a; thubuai an titawp nghal.

High Court chuan, Myanmar aṭanga ramri kâna dan loa kuhva tawlh rûk chu Mizoram police-in an chhui hleih theih loh avangin dik tak leh hleih nei loin CBI-in an chhui a ngai tih a tarlang a; CBI chu a ṭul anga thubuai ziak lut a, chhui turin a hriattir a ni.

Gauhati HC order-ah chuan, Mizoram sorkar (Vigilance depart­ment)-in Delhi Special Police Establishment Act, 1946 Section 6 tlawhchhanin December 28, 2023-ah CBI hnena general consent a pek tawh angin, CBI Director chu Myanmar aṭanga Champhai district kaltlanga India rama kuhva tawlhrûk leh a kaihhnawih thil - e-way bill leh GST certificate lem bakah thil dangte chhui tura hriattir a nih thu tarlan a ni bawk.

Mizoram Chief Secretary chuan June 12, 2024 khan High Court hnenah, PIL thehluttuin kuhva rah tawlhruk chungchang CBI chhuitir a duh chu state sorkarin a dodal loh thu a thlen. Mizoram Additional Advocate General pawhin state sorkar ding mekin kuhva rah tawlhruk a ngaimawh a, CBI chhuitir a hnial loh thu Court a hrilh bawk a ni.

Vanramchhuangi PIL hi Gauhati HC judge pahnih - Justice Michael Zothankhuma leh Justice Marli Vankung te chuan January 22, 2024 khan an ngaihtuah a ni.

January 22, 2024-a HC-in thupek a chhuah danin, December 29, 2021-a Champhai PS-a FIR thehluh ziah luh (register) a nih loh chhan sawifiah turin a hriattir a; Champhai PS officer in-charge -in preliminary enquiry a tih tawhna Court-ah thehlut turin a hriattir. Kuhva rah tawlh rûk chungchang chhui ṭha leh turin Mizoram sorkar a hriattir bawk.

Customs (Preventive) Division-a Assistant Commissioner-in July 13, 2022-ah High Court-ah affidavit a thehlut a; Mizoram Horticulture directorate aṭanga lehkha an hmuh angin, kum 2019-2020 chhunga Mizorama kuhva rah thar zat chu metric ton 33,540 a ni a, chu'ng zingah chuan Champhai district-a thar a awm lo. Sorkar laipuia Directorate of Arecanut & Spices Development-in kum 2019-20 chhunga Mizorama kuhva rah thar a tarlan chu metric ton 10,840 a ni a; Manipur-ah kuhva rah thar a awm lo.

July 13, 2022 vêka Mizoram Home department Under Secretary-in affidavit a thehluhah chuan, Champhai district-ah kum 2021 leh Khawzawl district-ah kum 2022-ah kuhva rah chìn ṭan a ni a, mahse, an la thar lo.