Hlimen Relief Camp hlanna hun hman a ni

Hlimen huam chhunga hmun him loa cheng, hmun him lama insawn tura tihte chenna atana sak Hlimen Relief Camp chu nimin khan Pathian hnena hlanna leh sak zawh lawmna buatsaih a ni a, Disaster Management & Rehabilitation (DMR) minister K Sapdanga'n a hmanpui.

Relief Camp hi pali niin, thla khat chhunga sak zawh a ni a, chhungkaw 41-in an luah. A sakna senso chu Relief Camp Committee-in sorkara an thehluh hnuah sorkarin pawisa a pe ṭhin a ni.

DMR minister K Sapdanga chuan, chhungkaw eng emaw zatin an in an chhuahsan a ngai chu pawi a tih thu a sawi a, "Relief Committee leh camp sakna atana tha leh sumpai thawhtu zawng zawng chungah lawmthu ka sawi. In sak a nih hian theih ang angin sorkar pawhin hma a la a, Bialtu MLA pawhin theihtawp a chhuah. Sorkar anga kan tih theih tawk a tlem hle mai a, kan tih theih ang ang kan tih ve chhunah ngaidam chunga min thawhpui hi kan lawm tak zet a ni," a ti.

Bialtu MLA Baryl Vanneihsangi chuan, bialtu MLA a nihnaah an beisei ang a tlin loh a inrin thu a sawi rualin, "Bialtu ka nihna zawnah tih theih ka neih chuan theihtawp chhuah chhunzawm zel ka tum," a ti a; relief camp-ah February 2025 thleng chauh an awm theih dawn avangin mahni in leh loa an chen leh theihna turin theihtawp an chhuah tur thu a sawi.

In sak thar hlanna inkhawm hi Relief Camp Committee chairman R Lalngheta'n a kaihruai a, Aizawl bawrhsap Lalhriatpuia, DMR director Lalrengpuia leh Central YMA aiawhte pawhin thu an sawi a ni.