Mizoramin hma a sawnna tur dap turin min tir - Union Minister

Sorkar laipuia Agriculture and Farmers Welfare minister of state Bhagirath Choudhary chuan nimin khan Aizawla BJP office-ah thuthar thehdarhtute a kâwm a; Mizoramin tun aia hma a sawn theihna tur kawng dap tura tirh a nih thu leh hmalakna tur eng emaw zat a hmuh thu a sawi.

Bhagirath Choudhary chuan, India ram chu prime minister Narendra Modi hnuaiah kum 2029-ah chuan kut hnathawktute sum lak luh a lêt li-in a pung dawn niin a sawi a, "Sorkar laipui chuan Mizoramin tun aia hma a sawn theihna tur kawng hrang hrang dap turin min tir a, hmalakna tur eng emaw zat ka hmu. Mizoram hi Pathian thil pek leilung hausakna ṭha tak nei a ni a, a bikin organic farming-ah theihna ṭha tak a awm," a ti.

Kut hnathawktute tan inkalpawhna kawng ṭha a pawimawh thu sawiin Choudhury chuan, "Ram pawn thlengin kan thil thar chhuah hralhna turte zau takin inhawng mah se, inkalpawhna kawng a ṭhat loh chuan duh angin hma a lak theih loh. Hemi kawngah hian sorkar laipui leh state sorkar kan ṭanrual a ngai a ni," a ti a; tourism hmasawnna tur leh loneitute dinchhuah theihna tak tak turin khaw kar kawng bakah, thlur li nei kawngpui leh rél kawng thlengin tihchangtlun a ṭul thu a sawi.

Bhagirath Choudhary chuan, khuarel chhiatna leh thil chi hrang hrang vanga kut hnathawktute'n harsatna an tawhte chu sorkar laipuiah puihna tur a awm thu a sawi a, "Amaherawhchu, state sorkar nena thawhhona a ngai a, state sorkarin report a rawn pek behchhanin zangnadawnna pek ṭhin a ni a, chu'ng sum kan pekte chuan kut hnathawktute hnen a thleng em tih erawh kan hriatpui tawh lo," a ti.

Union Minister chuan, loneitute tan crop insurance scheme a awm thu leh chumi hnuaiah chuan Mizoramah hma la an awm meuh loh thu a sawi bawk.