KHAWTHLIR

KṬP-in thisen pe

KṬP, Thenzawl Field Veng Pastor Bial chuan nimin khan Civil Hospital, Lunglei Blood Bank tan thisen unit 43 an pe a, petute mipa 42 leh hmeichhia pakhat an ni.

Mission Lab Wave

School Education minister Dr Vanlalthlana chuan nimin khan Serchhip DIET-ah Mission Lab Wave 2024 a hawng. Serchhip district-a middle school-ah science laboratory a awm loh avanga naupangin science zirna ṭha zawk an neih theihna tura din a ni a, bul ṭanna atan sikul 36 thlan a ni. Laboratory hmanruate chu naupang hman turin thawn/hawh theih a ni dawn a, a ṭul dan a zirin DIET-a thawktute'n sikul an pan ṭhin ang.

STA ṭhukhawm

State Transport Authority, Mizoram chu nimin khan an chairman C Lalzahngoa, Transport secretary pisaah an ṭhukhawm a, Aizawl khawpuia taxi, auto-rickshaw leh two wheeler taxi-te tana online booking hman chungchang an zirho. NIT, Mizoram leh Vullai ten presentation an nei bawk.

Mahni mawng hlîmah MNYF puh

ZPM Ṭhalai chuan thuchhuah siamin, MNF ṭhalaite'n 'Dâwt báwm' an hâl chu anmahni mawng hlîmna maia an ngaih thu leh MNF president Zoramthanga an rin tâwk tawh lohzia tihlannaa an ngaih thu an tarlang. "MNF ṭhalaite hian dâwt bâwm an hal rual hian an hâl tel ve tur atan a hnuaia MNF president Pu Zoramthanga, thusawi ṭhenkhatte hi kan dah tel e," tiin, Zoramthanga dâwt sawi nia an hriat 43 an tarlang a; hàl ve ngei turin MNYF president Robert Romawia Royte an ngen a ni.

Sum enkawl sawiho

Chief minister Lalduhoma kaihhruaiin nimin khan a pisaah Finance department hotu te leh ZIDCO hotuten sorkar sum enkawlna chungchanga thil pawimawhte an sawiho. CM chuan, hun rei lote chhungin Mizoram sorkar sum dinhmun a ziaawm chho tih sawiin, "Finance department thawktute inpekna vang a ni. Hmasawn zel tumin kan bei ang," a ti.