HBC-in zirlai ti ṭhate chawimawina hlan

Hrangbana College (HBC) chuan nimin khan an zirlai tharte lawmna Fresher Social an hmang a, Mizoram University under graduate result-a ti ṭhate chawimawina leh lawmpuina an hlan nghal a; minister Lalrinpuii, HBC first batch zinga miin a hmanpui.

Inkhawmah hian kumina MZU UG exam-a HBC aṭanga top 10-a lang zirlai mi 25 hnenah Hrangbana Award hlan a ni a; HBC aṭanga mark hmu sang ber K Malsawmkima, Commerce hnenah R Zatlaia Award hlan a ni.

HBC principal Lal­thleng­liana Hrahsel sawi danin, HBC hi July 22, 1980-ah din a ni a; depart­ment 10 awm mekin, academic session 2024-25 ah zirlai thar 647 an awm a, zirlai zawng zawng 1,683 an ni. MZU exam 2024-ah 80.05% an hlawhtling.

Lalrinpuii chuan, zirlai lut tharte chu lehkha zir mai bakah, co-curricular activity-a inhmang tam turin a chah a; sorkarin A-Z road map a siam tih sawiin, "Chuta ngaih pawi­mawh em em chu ruihhlo do a ni," a ti a, ruihhlo do leh tih­­rêmna tura sorkar hma­lâk­nate ṭhahnem ngai taka ṭawi­awm turin HBC zirlaite leh thawktute a sáwm.