Lunglei District Museum hawn a ni

Art and Culture minister C Lalsawivunga chuan nimin khan Lunglei Sazaikawna District Museum sak thar a hawng a; Museum chu ṭhangtharte tan rohlu hnutchhiah theihna ṭangkai a nih a beisei thu a sawi.

C Lalsawivunga chuan, District Museum thar chu Lunglei bakah, Mizoram chhim lam tan hmasawnna chhenfâkawm a nih a beisei thu sawiin, "Kan pi leh pute nun dan leh an chanchin vawnṭhat kawngah hma kan sawn zel ka beisei a, ṭhangtharte tan rohlu kan hnutchhiah theihna hmaraw ṭangkai tak a nih ngei ka ring," a ti.

Minister chuan, library lam pawh a changtlun zel theih nan ṭan lak a pawimawh thu a sawi a, "Social media-in nasa takin min luhchilh tawh mah se la, internet-a mi chhiar ringawt loin, lehkhabua kimchang taka thuziakte hi chhiar kan uar deuh deuh a pawimawh," a ti a; lehkhabu chhiar uar turin mipui a chah.

District Museum hawnna hi Art & Culture secretary Florence Zotluangpuii'n a kaihruai a; Lunglei West bialtu MLA T Lalhlimpuia leh LMC councillor te pawh an tel a ni.