Zirna siamṭha turin kum 3 chhunga hmalak dan tur ruahmanna siam a ni

Serchhip Teachers’ Association (STA) chuan nimin khan Serchhip College HD Rosanga Multipurpose Hall-ah 'Educator Enhancement Workshop' an buatsaih a, School Education minister Dr Vanlalthlana'n a hmanpui. Minister chuan, zirna siamṭha turin sorkarin kum thum chhunga hmalak dan tur ruahmanna a siam tawh thu a sawi.

Dr Vanlalthlana chuan, Mizorama zirna siamṭha turin sorkarin theihtawp a chhuah mek tih sawiin, "Kum thum chhunga hmalak dan tur ruahmanna siam a ni tawh. Zirtirtute'n quarters an neih loh vanga harsatna an tawh dante sorkarin a hria a, quarters 120 sakna tur kan dil a, Chief Minister pawhin min phûrpui," a ti a; sikul 50 sakṭhat dan tur ngaihtuah a nih thu leh Serchhip district-a sikul eng emaw zat a tel thu a sawi a ni.

Education Minister chuahn, zirna siamṭha turin zirtirtute'n mawhphurhna lian tak an neih thu sawiin, "Zirtirtute'n an tih tur an tih loh chuan sorkar hmalakna a thlàwn dawn a, theihtawpin ṭangho ang u. Training and Posting Rules, 2024 duan mek a ni a, zirtirtu pakhat chauh awmna sikul tihreh tum a ni a, casual teacher-ah politics-a induhsakna tel loin zirtirtu lak a ni," a ti.

Workshop-ah hian MZU exam 2024-a Serchhip College aṭanga Chemistry-a palina K Lalrindiki leh pakuana Lalrampari bakah, HSLC 2024-a pasarihna Zomuansanga hnenah STA Award hlan a ni.