Congress-ah rinna an nghat mek - MPCC

Congress party-a Legal department chairman TT Zothansanga chuan, MNF sorkarin thil tam tak an tiamte an tihhlawhtlin loh avang leh ZPM sorkar chu mipuiin an rinhlelh ṭan avangin Mizoram mipuiin Congress party-ah rinna an nghat thar leh mek niin a sawi.

TT Zothansanga hian nimina Congress Bhavan-a political session-ah thu sawiin, "MNF hian thil tam tak an tiam a, an tihlawhtling ngai lo. ZPM pawh hian tam tak an tiam a, kan enthla mek a, mipuite'n an ringhlel ṭan. Chuvangin, Mizoram mipuiin Congress-ah rinna an nghat thar leh mek a ni," a ti.

Congress party-in tih tura an intiam chu an ti ṭhin nia sawiin TT Zothansanga chuan, "Remna leh muanna atan lalṭhutthleng kan kian ang kan ti a, kan kian mai. Rangva kan sem ang kan ti a, kan sem mai a, ṭum hnih lai NLUP kan sem ang kan ti a, kan sem leh mai a ni," a ti a; kumina MZP huaihawta Remna Ni hmannaah chief minister Lalduhoma'n Lal Thanawla hming a sawi ri lo chu mak a tih thu a sawi.

TT Zothansanga chuan, Congress sorkar laiin kum 1990-1995 inkarah CBI hnenah general concent pek a nia sawiin, "Tu mahin case an thehluh loh avangin miin an hrethiam tâwk lo nia ngaiin sorkar phalna lak ngai turin kan dah leh ta zawk a ni," a ti.