AMC-in Bawngkawn-Durtlang kawnga in sak phalna a pekte Court-in a ṭhiat

Gauhati High Court (GHC), Aizawl Bench chuan Bawngkawn-Durtlang inkar kawngpui kama Aizawl Muni­cipal Corporation (AMC)-in in sak phalna leh lei laih phalna a pekte a ṭhiat.

Bawngkawn-Durtlang kawnga in sak leh lei laih chungchangah hian Indian National Trust for Art and Cultural Heritage (INTACH), Mizoram Chapter convener Rin Sanga hnen aṭangin Gauhati High Court chuan PIL a dawng a; July 18, 2024 khan order tichhuakin, Bawngkawn-Durtlang inkar kawnga leimin vangin suo moto-in thubuai a siam bakah, AMC-in in sak phalna leh lei laih phalna a pekte chu a ṭhiat (cancel) nghal a ni.

Gauhati High Court Aizawl Bench chuan, leiminin lirthei veivak leh mihring nunphung a tihbuai thu a tarlang a, "Mizoram sorkar leh AMC-in he lai kawngah construction work tih a nih lohna atana hma an la lo hi a mak hle. Ram 60% degree-a aia awiha AMC-in in sak a phal hi thil mak tak a ni. Heng in sakte hian environment-ah nghawng a neih bakah, he lai chhehvela chengte hi dinhmun hlauhawmah a awmtir a ni," a ti.

High Court hian INTACH Convener-in PIL a thehluh hmangin thubuai a siam a; chu chu INTACH leh Chief Secretary, Land Revenue & Settlement Secretary, UDPA Secretary, Home Secretary, Aizawl DC, Aizawl SP leh AMC Commissioner-te inkhinna tur a ni.

Bawngkawn-Durtlang inkar huam chhunga AMC-in lei laih leh in sak phalna a pek tawhte chu Gauhati High Court Aizawl Bench chuan a ṭhiat nghal a, in sak mekte pawh chhâwng khat an la sak pum loh chuan tihtawp nghal tur a ni. Aizawl DC leh Aizawl SP chu chawlhkar hnih chhungin Bawngkawn-Durtlang kawnga in sa leh lei laite'n an chawlhsan leh chawlhsan loh chung­chang High Court-a report thehlut turin a hriattir.

High Court thutlukna avang hian Bawngkawn-Durtlang inkarah AMC aṭanga phalna hmute tan pawh in sak leh lei laih phal a ni tawh lo a; AMC-in a phalna a lo pek tawhin awmzia a nei lo.

AMC-in in sak phalna a pek zawng zawng zinga in chhâwng khat pawh la sa zo lote list thehlut turin High Court chuan AMC a hriattir. Court thupek hian leimin tur venna atana hnathawh erawh a huam lo thung.