Vawk suat neitute'n zangnadawmna an hmuh theih nan theihtawp kan chhuah - Vety Minister

Animal Husbandry & Veterinary minister C Lalsawivunga chuan, African Swine Fever (ASF) vanga vawk suat neite'n zangnadawmna an hmuh theih nan theihtawp an chhuah thu a sawi.

Nimin thleng khan ASF avangin Mizoramah vawk 6,791 a thi tawh a, vawk 12,808 suat a ni tawh bawk a; a vaiin vawk 19,599 a ni.

Vanglaini palai zawhna chhangin C Lalsawivunga chuan, ASF vanga vawk suat neitute tan sorkar laipui lam dawrin zangna­dawmna an dil thu a sawi a, "Vawi thum vel reminder kan thawn tawh, a harsa khawp mai. Kan Chief Minister leh Lok Sabha MP-te pawhin an bawhzui," a ti.

AH&Vety Minister chuan beidawng loin theihtawp an chhuahzel tih sawiin, "Calamity leh disaster ang zawngte'n zangna­dawmna dawn theih dan tur kan zawng. State sorkar sum aṭang chuan tih ngaihna a awm si lo," a ti a; zangnadawmna tur sum an hmuh theih dawn leh dawn loh a la hriat loh thu a sawi.

ASF vanga an vawk chánte a lainat thu sawiin C Lalsawivunga chuan, "An chán nasa a, rilru a na tak zet zet a ni. An thawhrimna a thlawn mai turte hi an lainatawm hle. A pawi kan ti tak zet a ni," a ti.

Vety Minister chuan, tun dinhmunah chuan vawk vulh leh tura ṭanpuina inpek chi a ni rih lo tih sawiin, "Hand Holding Policy hnuaiah project kan thehlut a, a tlang ang em kan hre lo," a ti a; hri a reh hunah vawk vulhtute'n an chhun­zawm leh theih nan a theih ang anga hma an lak tur thu a sawi.

Ran chaw lamah theihtawp an chhuah tih sawiin Minister chuan, "Ran chi hrang hrang chawah kan intodelh theih nan theihtawp kan chhuah a, Thenzawla department ramah a hma aia tam daih ran chaw chìn belh a ni. Bawng chaw phei chu lirthei hman man chiah bawng vulhtute tum turin kan pe tawh," a ti.

C Lalsawivunga chuan, a mimal sumin state pawn aṭangin bekang leh vaimim chi a chah luh thu sawiin, "Ka ngamtlak zualte Mizoram hmun hrang hrangah ka chìntir a, enchhinna atan kan hmang," a ti a; Mizorama chìn chi a nih chuan department-in hma an lak chhunzawm tur thu a sawi.