Minister-in union minister pahnih a kâwm
Minister of state Lalnghinglova Hmar chuan July 19, 2024 khan New Delhi-ah sorkar laipuia Sports minister Mansukh Mandaviya leh Skill Development & Entrepreneurship minister Jayant Chaudharya te a kâwm a, a department enkawl kaihhnawih thil pawimawhte a sawipui.
Sports minister Mansukh Mandaviya a kawmnaah Lalnghinglova Hmar chuan, India ramin kum 2036-a Olympics thlen a tumnaah Mizoramin tel ve ngei a duh thu leh Sports Conclave buatsaiha bul a ṭan tawh thu sawiin, hma lakpui zel turin a sáwm a, "State lian lo tak, mihring tlemtê awmna kan ni chungin India ramah infiamna avangin hriat kan hlawh a, state rethei zawk tan budget-ah infiamna hmasawnna tur dah tam a harsa a, sorkar laipuiin min puih zel kan ngai a ni," a ti.
Mansukh Mandaviya chuan, project siama a rang lama thehlut tura SYS Minister chahin, puih ngei a tiam a; kumin chhung ngeia Mizoram tlawh a tum thu leh Mizoramin 'Vision 2036 Olympics' a nei chu lawmawm a tih thu a sawi.
Labour, Employment, Skill Development & Entrepreneurship (LESDE) minister nibawk Lalnghinglova Hmar chuan July 19 vek khan sorkar laipuia Skill Development & Entrepreneurship minister Jayant Chaudhary chu New Delhi-a a pisaah kawmin, Mizorama hnathawh leh thiamna chhawr theih mil skill development lam duansak turin a ngen.
LESDE minister Lalnghinglova Hmar chuan, Ministry of Skill Development & Entrepreneurship hnuaia hnathawh theih hrang hrang chu Mizoram nena inmil lo a tam thu Jayant Chaudharya a hrilh a, Mizorama hnathawh leh thiamna chhawr theih mil skill development lam duansak turin a ngen.
Lalnghinglova Hmar chuan, Ministry of Skill Development & Entrepreneurship-in Pradhan Mantri Kaushal Vikas Yojana (PMKVY) 4.0 hnuaia Mizoram puala special project an pek leh chumi atana March 2024-a sum an ruahman avangin a lawm thu a hrilh.
India hmarchhak huapa kut themthiamna chungchang inrâwnkhawmna neih ni se tia LESDE Minister-in a rawt chu 'October 2024 velah ruahman ni se,' an ti a; Union Minister chuan, Mizo ṭhalaite’n theihna an neih chu tun aia sang zawk thlentir a tum thu sawiin, chuta tan chuan sorkar laipui a inhawn reng thu a sawi.
Sorkar thuchhuah tarlan danin, Ministry of Skill Development & Entrepreneurship hian PMKVY 4.0 hnuaia Mizoram State Special Project atan March 1, 2024 khan cheng vbc 31.06 a ruahman a, chumi kaltlang chuan ṭhalai 10,000 chuang kut themthiamna lam inzirtirna (skill training) neihpui tum a ni.