Darlawnah in pali a kâng

July 19, Zirtawpni zan dar 11:50 vel khan Darlawn Lungverh kâwnah in pali a kâng a, mihring thi leh hliam an awm lo a, ui pakhat a kâng hlum.

Darlawn aṭanga thu dawn danin, kângmei hi Zadailova te in, Assam type, a hnuai lam mi pakhat luah lai aṭanga inṭan nia hriat a ni. In luahtu hi a riah chhuah avangin in kan chhan hriat a ni lo.

Zadailova te in hi bungrua chuh hman lohin a kâng ral a, an ṭhenawm vei lama awm Lalfamkima in Assam type chhawng hnih pawh bungrua chuh hman lohin a kâng ral. Lalfamkima in hi a chhawng chungah Lalremruata te chhungkua (member paruk) an cheng a, chhâwng hnuaiah zirlai pathum an chêng bawk.

C Thanṭhuama te in cement concrete building pawh bungrua eng emaw zat a kâng a, thawmhnaw zawrh lai a kan vek bakah, in pindan pakhat a kâng chhe nual. A chhawng hnuai Lallawmzuala luah lai pawh bungrua eng emaw zat a kâng chhia a ni.

In kan ṭanna Zadailova in dinglama awm Raldingliana in, cement concrete building chhawng thum pawh bungrua chuh hman lohin a kâng a, an ui a kâng hlum.

Kâng ṭhelhna turin PHE department-in water public point aṭangin tui an pe a, mimal tui connection-te aṭangin tui chhuah a ni bawk a, chumi hmang chuan kâng ṭhelh hna thawh a ni a; zing dar 1:40 velah an ṭhelh mit thei. Kângmeiin a tihchhiat zawng zawng chu cheng nuai 91.70 hûa chhût a ni.

July 20, Inrinni nilêng khan kângmei chhuahna senghawiin hnatlangpui neih a ni a; Darlawn khua bakah a chhehvel khua - Khawruhlian, Hmunnghâk, Lailak, Khanpui, Pehlawn, East Phaileng, Kepràn, Sàwleng, Serzawl, Chhanchhuahna, Sunhluchhip, Sailutàr leh Ratu aṭang te, hmar lam khaw hrang hrang aṭangtein hnatlangin mi ṭhahnem tak an thawk chhuak a ni.