R Buchhawna Proficiency Prize

Mizo Writers Association (MWA) chuan July 20, Inrinni khan Mizoram University hnuaia under graduate final year (sixth semester) exam-a Mizo subject-a pakhatna hnenah R Buchhawna Proficiency Prize an hlân.

R Buchhawna Proficiency Prize hlanna inkhawm hi Zarkawt Recreation Centre hall-ah buatsaih a ni a, MWA president R Lallianzuala'n a kaihruai. Chawimawina hi R Buchhawna fanu Zochhingi'n BA final year Mizo subject-a pakhatna Priscilla Lalduhsaki, Phulpui/Mission Veng, Pachunga University College hnenah a hlân a ni. Prize hian Rs 10,000 leh thuchei a keng.

Chawimawina hlanna inkhawmah hian R Buchhawna fanu Zokhumi Vankung-in thu a sawi a, MWA Committee member Gladys Lalhruaitluangi'n R Buchhawna chanchin a chhiar a; MWA financial secretary PC Lalrinpuia'n Proficiency Prize dawngtu kawmna hun a hmang.

MWA hian kum 2008 aṭang khan exam hrang hranga Mizo subject-a ti ṭha ber hnenah proficiency prize chi li an hlan ṭhin a; HSLC-a Mizo subject-a ti ṭha ber hnenah Ch Pasena Proficiency Prize, HSSLC-a Mizo subject-a ti ṭha ber hnenah Lalmama Proficiency Prize, BA Mizo subject-a ti ṭha ber hnenah R Buchhawna Proficiency Prize leh MZU-a MA Mizo subject-a ti ṭha ber hnenah J Malsawma Proficiency Prize an hlan ṭhin a ni.