Zorinpui - Paletwa kawngpui sial January 6, 2026-ah zawh tum a ni

Lawngtlai bawrhsap Cheemala Siva Gopal Reddy chuan July 20, Inrinni khan Mizoram chhim tawp Zorinpui leh Paletwa (Myanmar) inkara kawngpui sial hna thawk mek a tlawh. Zorinpui-Paletwa inkar kawng km. 109.2-a thui laih hna hi IRCON International Ltd enkawl niin, contractor 11 an awm a, January 6, 2026-ah zawh tura ruahman a ni.

Cheemala Siva Gopal Reddy chuan, Kaladan Multi Modal Transit Transport Project (KMMTTP) kawngpui zawh a nih chuan sumdawnna lian zawk kalpui theih a nih dawn thu a sawi a, "Lawngtlai bakah Mizoram hmun hrang hranga chengte tan hamṭhatna tam tak a thlen dawn a, chhungkaw tam tak tan eizawnna ṭha a siam dawn. Hmasawnna tluantling awm tur leh KMMTTP hlâwkna têl turin a ram leilung fate'n tun aṭanga rilru siam a ṭul," a ti.

Hmasawnna hna thawh tam tak a hun takah zawh a ni lo fo tih sawiin Bawrhsap chuan, "A hun taka zo turin contractor-te an pawimawh rualin, mipui pawhin harsatna siam loa ṭha taka hna an thawh theihna tura kan thurualpui thiam a ṭul," a ti a; KMMTTP zawh a nih chuan Lawngtlai chu dry port ṭha tak a nih dawn thu a sawi.

Kawng siamtu contractor-te chuan fûr ruahtui tam lai a nih avangin hnathawh a chak theih loh thu te, Myanmar lama thuneihna kengkawh mektu United League of Arakan (ULA) nen thawhhona ṭha tak an neih thute an sawi a; chak zawka hna an thawh theih nan power supply ṭha zawk an mamawh thu an lo hrilh bawk.

ZORINPUI - PALETWA

- Kawng laih hna IRCON International Ltd.-in an enkawl a, an hnuaiah contractor 11 an awm.

- Km. 109.2-a thui Zorinpui - Paletwa hi July 7, 2024-ah laih ṭan a ni a, January 6, 2026-ah zawh tura ruahman a ni.

- Kawngpui bakah tui luankawr, lei (bridge), bus bay, bus shelter leh truck lay bye-te siam a ni dawn.