Kan biala hnathawh a chhiatin mawhphurtu tur ka ni - Chhanzova

Aizawl East-II bialtu MLA B Lalchhanzova, minister of state chuan July 20, Inrinni khan a bial chhung Chhinga Veng leh Chite Vengah hmasawnna hnathawh mekte a enfiah a, sorkar hmalakna kal mekte khawtlang hruaitute a hrilhfiah. Minister chuan, an bial chhunga hnathawhte a chhiat chuan mawhphurtu tur a nih thu a sawi.

B Lalchhanzova chuan, a bial chhunga hma­sawnna hnathawhte mipui aiawh a nih angin a hriat chian a ngaih thu a sawi a, "A chhiat a ṭhatah mawh ka phur a, mipui aiawha hma hruaitu tur ka ni. Kan bial chhunga hmalakna thil dang pawh kan ennawn zel ang," a ti.

Aizawl East-II bial chhunga hmasawnna hnathawh mekah hna thawhna tur sum awm ang angte ṭangkai taka hman a nih theih nan khawtlang hruaitute leh nodal department-te'n inpawhtlang taka sawiho ṭhin a pawimawh thu Lalchhanzova chuan a sawi bawk.

Bialtu MLA ho hian Chhinga Veng Bethany huam chhunga lei dawh mek chu mipuite'n an chhawr ṭangkai hma theih dan tur nodal department leh khawthlang hruaitute'n ruahmanna an siam a ni.

Chite Venga Tourism department-in Pilgrimage Rejuvenation and Spiritual Heritage Augmentation Drive (PRASHAD) hnuaia hma an lakna, Pilgrimage Facilitation Centre chungchangah Chite Veng khawtlang hruaitute leh a kaihhnawih department hotute B Lalchhanzova chuan a pisaah a hrilhfiah.

B Lalchhanzova chuan, hmasawnna ruhrel emaw, sorkar programme-te kalpui a nih dawnin a nghahna hmuna mite'n a tam thei ang berin hriain hmelhriat ṭhin se a duh thu a sawi a, "Hei hi mipuite'n sorkarah rinna an neih leh zual nan pawh thil ṭangkai a ni," a ti.

Pilgrimage Facilitation Centre-ah hian Pathian biaa inhmuhkhawmna te, art and craft centre, handloom centre, multi utility kiosk, open area, pilgrimage congregation area bakah mipui tana hman ṭangkai theih thil eng emaw zat a awm dawn a; in sakna atan cheng vbc. 31.49 ruahman a ni.