Bawngkawn-Durtlang chhak lama LSC/VC pass titawp vek turin ngen

Bawngkawn Shalom Vengthar Welfare Committee chuan thuchhuah siamin, Bawngkawn-Durtlang kawngpui chhak lama LSC/VC pass-te titawp vek tur leh kawng chhak lam zawng chu in sak phal lohna hmunah puang turin sorkar an ngen.

Bawngkawn Shalom Vengthar Welfare Committee chuan, tun hnaiah Bawngkawn-Durtlang kawnga Bawngkawn Shalom Vengthar huam chhung kawng chhak lamah mimal in sakna tur leh petrol pump siamna tura lei laih chuan nasa takin harsatna a thlen tih an tarlang a, "Ṭha lo kan ti tak zet a, lei laih vanga leimin nasa leh hlauhawm vanga chhungkaw tam tak mahni in leh lo luah ngam loa an awm hi kan tuarpui tak zet," an ti.

Shalom Vengthar Welfare chuan, "Tun hnuah chuan he lai chho kawng chhak lama in hmun/lo/ram neite LSC/VC pass zawng zawng hi cancel vek turin sorkar kan ngen a, kawng chhak lam zawng zawng hi in sak phal lohna hmun (protected area)-ah puang ngei turin kan ngen tak meuh a ni," an ti a; sorkar hmalakna mumal hmuh tur a awm loh a, an veng tana him lo hmalakna a awm chuan enliam mai an tum loh thu an tarlang.

Bawngkawn Shalom Vengthar Welfare an veng chhung mipuite thlabar leh manganga an awm mek laia in hmun neitu leh leu laitu berin a hmunah kala thuphá a la chawi lo chu mak an tih thu leh inthamlohnaa an ngaih thu an tarlang bawk.