Buyer Seller Meet, 2024 buatsaih a ni

Thlai thartute leh leitute indawr tawnna 'IFAD-FOCUS Mizoram Buyer Seller Meet 2024' chu July 19-20, 2024 chhung khan Millennium Centre Exhibition Hall-ah buatsaih a ni.

Buyer Seller Meet hi July 19, 2024 khan Agriculture & Farmer Welfare minister PC Vanlalruata'n a hawng a; thu sawiin, "Ram sum leh pai dinhmun siamṭhat nana pawimawh ber leh mipui tam zawkte eizawnna agriculture sector chàwi kàn kawngah kan zavaia ṭanrual a ngai a, hei hi kan puitlin theih phawt chuan kan ramah agriculture-in nasa takin hma a sawn dawn a ni," a ti.

Minister chuan, kut hnathawktute dinhmun leh harsatnate hriat a pawimawh thu sawiin, "Thar chhuah awm ringawt mah se, a hralhnain a ûm zui loh chuan hmasawnna tluantling a awm thei lo a, market-in hma a hruai loh chuan harsatna tam tak kan tâwk thei," a ti a; awmze nei taka kut hnathawktute leh market thlun zawm a nih hunah hmasawnna a awm dawn thu a sawi.

Agriculture Minister chuan, sorkarin agriculture marketing a ngaih pawimawh avangin Agricultural Market Assurance Fund Management Fund Board (AMAFMB) a din thu leh theihtawpa hmalak mek a nih thu a sawi a; agriculture marketing tihchangtlun lama thawhpui turin kut hnathawktute leh kutkawih eizawnna buaipuitute a sáwm.

Buyer Seller Meet-ah hian FOCUS Project hnuaia district paruk aṭanga farmers interest group (FIG), entrepreneur, society leh farmers producer organisation (FPO)-te'n stall 40 chuang an siam a ni.