Commerce & Industries department rama dan loa awmte insaseng tura hun pek rêl

Commerce & Industries minister F Rodingliana hoin July 19, 2024 khan a pisaah sorkar hotute'n Industries ram thubuai chingfel tura chak zawka hmalak dan tur an sawiho a; Commerce & Industries rama dan loa awm leh a nihna tur anga ram hmang lote insaseng hun pek an rêl.

Ṭhutkhawmah hian Commerce & Industries department ram chhunga dan loa awmte leh allotment anga hma la lote chu insa­sengna hun pek ni se, huntiam ral rualin Joint Task Force-te'n a hmunah kal­chilhin, thupek zâwm lote zawn chhuah ni se, an ti.

Document leh pass pe chhuak theitu dik tak (competent authority)-in a pek ni lo hmanga industries ram luahtute leh allotment hmang dik lote chu rang taka chhuahtir turin chak lehzuala hmalak an rél a; Luangmuala Industrial Growth Centre (IGC) ram chinfel chu hmalakna hmasaa neih an rél bawk.

Ṭhutkhawmah hian Aizawl DC, Commerce & Industries department leh Land Revenue & Settlement department hotute an tel a; Commerce & Industries department ram zuar an awm thu tarlan niin, chu'ng ramte chu lei lo turin mipui an chah a ni.