MLA-in lei chêtna hmun a tlawh

Aizawl North-III bialtu MLA K Sapdanga, Disaster Management & Rehabilitation (DMR) minister chuan nimin khan a bial chhung Edenthar Venga lei chêtna hmun a tlawh a, Aizawl bawrhsap Lalhriatpuia, Edenthar Veng Local Council leh YMA hruaitute'n an ṭawiawm.

Lei chêtna hmunah hian in pakhat ṭhiah nghal a ngaih avangin Edenthar Veng khawtlang chuan hnatlang an ko nghal a, K Sapdanga chuan hnatlangte ei leh in senso atan DMR department sum aṭangin Rs 10,000 khawtlang hruaitute a hlan a ni.

Edenthar Venga lei che vang hian chhungkaw eng emaw zat an inthiar chhuak tawh a, DMR Minister chuan khawtlang hruaitute hnenah mahni in chhuahsan chhungkuate chu BSUP building, Edenthar Vengah an awmna tur ngaihtuahsak nghal an nih tur thu a hrilh.

Edenthar Veng lei chetna hmunah hian lung lian tak tak lum mai thei tura ngaih a awm nual a; Aizawl DC leh DMR department ruahmannain lungte chu thian fai tura hmalak a ni.