Court-in sorkar a rin zawh lohzia a lang - MNF Ṭhalai

Mizo National Youth Front (MNYF) Gen.Hqrs hruaitute chuan, kuhva ro tawlh chungchang High Court-in CBI chhuitir tura a ti chu lawmawm an tih thu an tarlang a, "High Court-in Mizoram sorkar a rin zawh lohzia a tilang," an ti.

MNYF hian July 20, Inrinni khan Bilkhawthlir Kuhva Chingtute duty post te, tun hnaia Phaisen Venglaia dan loa kuhva rah tawlh rûk chhehrelh manna hmun te, sorkarin kuhva rah an man sa ip 5,849 bona Vairengte kudam leh Vairengte IOC Venga kuhva ip 2,000 chuang awmna kudam hmuh chhuah tharte an tlawh.

MNYF vice president Lalnunmawia Pautu chuan, kuhva ro ip 2,000 hmuh chhuah thar leh Vairengte kudama kuhva bo bâng ip 3,786-te chu bo tawh lo se an duh thu a sawi a, "ZPM sorkar hnuaia kuhva man tawh sa tam tham tak a bo hi ZPM thuneitute an inrawlh a rinhlelhawm hle," a ti.

Myanmar aṭanga kuhva rawn lut avangin Mizorama kuhva chíngtute'n harsatna nasa an tawk tih sawiin MNYF Vice President chuan, kuhva rah man sa ip 5,849 a bo chuan ngaihtuahna a tihthui thu a sawi.

MNYF Vice President chuan, "ZPM sorkarin a duh lo viau nâin mi ṭhahnem ngaite PIL vanga High Court-in dan loa kuhva ro tawlh chungchang CBI chhui tura a dah ta hian High Court-in Mizoram sorkar a rin zawh lohzia a tilang," an ti a; High Court thutlukna chu lawmawm an tih thu an tarlang a ni.