KHAWTHLIR

Expo 2024-ah tel

Adviser to chief minister (Hand Holding) Dr KC Lalmalsawmzauva chu July 20, Inrinni khan New Delhi-a Pragati Maidan-ah agriculture leh horticulture lama state tinte hmalakna pholanna leh zawrhna, International Agriculture & Horti Expo, 2024-ah a tel. Expo hi Uttar Pradesh IT minister Sunil Kumal Sharma nen khuallian niin an hawng dun a; state hrang hranga department 100 chuang leh firm 130 chuangin stall an siam a; Mizoram Horticulture department pawhin Mizorama thar thlai, thei leh pangparte bakah, thil siamte an pho chhuak.

MLA-in hlan

Aizawl East-II bialtu MLA B Lalchhanzova, minister of state chuan July 20, Inrinni khan Tuithiang Vengthlang Taxi Stand Welfare leh Tuithiang Venglai Taxi Stand Welfare-te hnenah tui dah vawhna (water cooler) a hlân.

Damdawi-in tlawh

Lunglei DC R Lalṭhazuala chuan July 20, Inrinni khan Civil Hospital, Lunglei a tlawh a, damdawi-in hotute'n harsatna leh mamawh an lo thlente chu theihtawpa bawhzui a tum thu a sawi a, "Hriselna lam tihchangtlun leh district mipui hriselna tura hmalaknaah theihtawp chhuaha ṭanho a ṭul," a ti. Lunglei Civil Hospital-ah hian medical superintendent hoin doctor 33 an awm mek a, psychiatrist tih loh chu department zawngah doctor an awm kim.

ASF lêng sawiho

Lunglei District Coordination Committee on African Swine Fever and Trans-boundary Animal Diseases chu an chairman R Lalṭhazuala, bawrhsap hoin July 19, 2024 khan an ṭhukhawm a, ASF lêng kaihhnawia hmalak dan tur an sawiho. Kum tin khaw lum ṭan hun velah ASF a lan chhuah ṭhin thu leh thlasikah a reh leh deuh ṭhin thu tarlan a ni.

CS nen inkâwm

Combined civil service probationer (training mek), 2023 batch-te chu July 19, 2024 khan chief secretary Renu Sharma nen CS conference hall-ah an inkâwm. Dr Renu Sharma chuan fuihna thu sawiin, ram tan ṭhahnemngai leh rinawm taka thawk tur te, mipui tana thawk an ni tih hre reng turtein a a chah.