Vawk chi dahṭhat tur sawngbawlna Hmuchhuaktu doctor chawimawi

AH&Vety department chuan, nimin khan an conference hall-ah vawk chi dahṭhat tur sawngbawlna hmu chhuaktu, Regional Boar Semen Station manger Dr H Lalzarliana chu chawimawina an hlân.

Dr Lalzarliana hnena chawimawina thilpek hlantu AH&Vety minister C Ngunlianchunga chuan, "Chawimawi ngaite chu chawimawi a, hrem ngaite chu hrem mai tur a ni. Mahni hmazawn ṭheuha theihtawp chhuah ila, a rah a rawn chhuak dawn a ni," a ti.

AH&Vety Minister chuan, PRRS hrilêng mek enkawl dan hriat chhuah tum turin Vety doctor-te a chah a, "Kan hmelma PRRS kan hneh lo lutuk hi inenfiah nan i hmang ang u," a ti a; PRRS chungchangah Vety mithiamte'n tun aia
ṭan an lak nasat a ngaih thu a sawi.

Thu dawn danin, vawk chi ṭum khata lak hian a tak dan leh a tam lam aṭanga tehin, vawkpui 10-15 kah râi nan hman a ni. Vawkpuite chu kâp nghal loin, mamawh hun atan ni nga vel thleng dahṭhat theiha sawngbawl a ngai a, a dahṭhatna damdawi chu Dr H Lalzarliana'n a hmuchhuak a ni.

Vawk chi dahṭhatna hi tun hma chuan India ram páwn aṭanga chah luh ṭhin a ni a, chah chhung a rei bakah sum sên a ngai tam a; Dr H Lalzarliana hmuhchhuah hi chu Mizorama a hmanrua awm vek, tláwm têa siam chhuah a ni.