Aizawlah two wheeler taxi tlântir dawn

Mizoram sorkar chuan Aizawl khawpui chhungah two wheeler taxi a tlantir dawn ta a, tunah hian permit dilna hun hawn mek a ni.

State Transport Authority (STA) chuan Transport department-ah two wheeler taxi tlantir phalna a pe tawh a; Transport department pawhin hriattirna a chhuah tawh. June 21, 2016 khan two wheeler taxi permit dilna pek chhuah ṭan nnin, June 2016 chhunga thehluh tur a ni.

Vanglaini palai zawhna chhanga Transport minister John Rotluangliana sawi danin, two wheeler taxi hi Aizawlah chauh tlantir rih tur a ni a, an tlân ṭan hun tur tak erawh sawi theih a la ni lo.

John Rotluangliana chuan, permit pek chhuah tur zat sawi theih a la nih loh thu a sawi rualin, "Ruling leh opposition thliar loin, MLA 40-te hnenah two wheeler permit pek tur mi panga ṭheuh rawt turin kan hriattir tawh," a ti a; two wheeler taxi rawng bik turah thu-tlukna a la awm loh thu a sawi bawk.

Chief minister Lal Thanhawla chuan May 20, 2016-a Congress Bhavan-a inkhawma thu a sawi-naah, two wheeler taxi siam rawt a tum thu a lo sawi tawh a ni.

Two wheeler taxi kalpui dan tur ruahman

1. Two wheeler taxi-a hman tur chu kum hnih aia upa lo.

2. Engine len zawng (capacity) 150 cc aia tê lo.

3. Public service vehicle (transport vehicle) a nih angin, tax, fee, permit leh certificate-te transport vehicle-a mamawh ang zawm vek tur.

4. Transport vehicle registration number plate hman ang, plate eng (yellow)-ah hawrawp dum (black)-a ziah tur.

5. Plying permit chu kum nga atan pek a ni ang. Kum nga hnuah service tlak a la nih chuan kum nga dang permit pek belh theih a ni a, chumi bak chu a thara thlak emaw, permit renew emaw phal a ni lo ang.

6. Permit diltu chu India khua leh tui a ni tur a ni a, transport vehicle (two wheeler) khalh phalna professional driving licence a nei tur a ni.

7. Helmet ISI mark chuang, rawng eng (yellow) khum tur a ni.

8. Passenger chuan man km. 1-ah Rs. 10 a ni ang a, km. 1 aia thuiah chuan Rs. 5 zelin a pung ang. Zan dar 9 leh zing dar 5 inkarah chuan man 25%-in a pung ang.

9. Inkaihhruaina leh dan zawm loh vang te, customer chunga mawi lo taka chêt vang te, passenger-in complaint a neiha a dik tih finfiah a nih chuan sum chawitir emaw, plying permit suspend leh cancel theih a ni.

10. Two wheeler taxi mipa khalh chu mipa hman/hire tur a ni a, hmeichhe khalh chu hmeichhiate hman/hire tur a ni ang.