KHAWTHLIR

Thisen pe

Darlawn Joint KṬP-te chuan nimin khan Venghlun Kohhran hall-ah blood donation camp an huaihawt a, Aizawl Civil Hospital tan mipa 53 leh hmeichhia 21-te'n thisen unit 74 an pe.

Lei laih khap

Aizawl DC chuan thupek chhuahin, Aizawl district chhunga kawngpui (national highway leh state highway) hrûlah kumin fûr chhungin phalna la loa lei laih a khap. Thupek hi fûr laia lei laih leh khawih chêtin leimin a thlen theih vang leh, ni tin mamawh châkkhai lakna kawng leh mihring nunna thleng pawha harsatna tawh theih a nih vanga siam a ni.

Dan zâwm lo Pawisa chawitir

Aizawl District Anti Tobacco Squad-te chuan, nimin khan MacDonald Hill leh Chanmari inkara pisa leh sikul bula dawrahte vaihlo khuahkhirhna dan bawhchhia an awm leh awm loh an enfiah. Phal lohna hmun a mei zu mi pakhat an man bakah, COTPA Section 6b (zirna-in aṭanga ft. 300 bial chhunga vaihlo leh a kaihhnawih zawrh khapna dan) bawhchhia dawr palite pawisa an chawitir.

Counselling zirho

MSACS, VOLCOMH, Project Sunrise-FHI360 leh Sampurna Monfort College, Bangalore-te chuan nimin khan Zosaphluia Building, Mission Vengah MSACS hnuaia targettd intervention (TI) counsellor-te pualin 'Counselling supervision' zirhona an buatsaih. Workshop-ah hian counsellor-te'n a taka harsatna an tawh mekte awmze nei zawka an hmachhawn theih dan tur zirho a ni a; vawiinah chhunzawm a ni ang.

NLUP sem

Nimin khan Lunglei Farm Veng community hall-ah NLUP hnuaia ar vulh thlangtute hnenah ṭanpuina sum sem a ni. Ṭanpuina dawngtute hi Lunglei district-a MLA constituency pasarih chhunga ar vulh thlangtu chhungkaw 500 an ni a, Rs. 20,000 ṭheuh pek an ni.

Minister-in enfiah

Minister of state Dr BD Chakma chuan, Thawhlehni khan Chawngte damdawi-in, Community Health Centre (CHC) a tlawh a, an dinhmun leh mamawhte a enfiah. Dr. BD Chakma hi CADC chief executive member Kali Kumar Tongchangya-a'n a ṭawiawm a ni.

Din champha lawm

Lunglei Venghlun MUP chuan nimin khan Venghlun Primary School-ah an din champha an lawm a, bialtu MLA Chalrosanga Ralte-in a hmanpui. Chalrosanga Ralte hian Venghlun MUP hnenah lawmpuina Rs. 5,000 leh MUP member kum 80 chung lam mi 24 hnenah Rs. 500 ṭheuh a hlan a ni.