YMA duty-te'n Gas tihchingpen lai an nangching

Central YMA Kum-puan duty-te chuan, nimin zing dar 2 vel khan Khamráng khaw dáiah gas phur truck pathuma gas an tichengpen lai an nangching a, gas tichingpentute an tlanchhia.

CYMA Kumpuan Committee member-te hian Khamrang khaw dáiah gas thichingpen mek an awm thu an dawn bawhzuiin, Thawhlehni zan khan Khamrang an pan nghal a; Khamrang an thlen chuan gas tichingpentute an hmu mai lo a, Khamrang khaw chhungah luh an tum mek laiin, khaw daiah gas rim an hria a, NLUP link road, kawngpui aṭanga hla lo tê-ah truck pathum MZ-01 1335, MZ-02 9252 leh NL-08 A-5146-a gas tihchingpen tum mek an nangching a ni.

Truck driver, handyman bakah gas khawih chingpennaa inhnamhnawih dangte chu Kumpuan duty-te thâwm hriain an tlanchhia a, an motor chahbi, mobile phone, wallet-te an tlanchhiatsan.

CYMA Kumpuan duty-te'n gas phur tihchingpen lai an man zinga a ruak zawng zawng chu CYMA office-ah an dah a, a khat ho chu a kalna tur hmun dik taka kaltir tum a ni.

Gas-te hi challan-a a lan dan chuan, June 21-a Mualkhang Bottling Plant aṭanga phurh chhuah, Zopuii Gas Agency, Seling Kawnveng Gas Agency leh Zomawi Gas Agency, Tlabunga dah turte a ni. Truck pathum zinga pahnih chuan gas bûr 306 ve ve an phur a, truck pakhat chuan bûr 276 a phur. Truck pakhat aṭang hian pick-up trip khat an la chhuak tawh niin Kumpuan duty-te chuan an sawi.