Mizoramah nausên thihna a tlahniam

23rd June, 2016

Health department-a nu naupai leh naupangte hriselna lam buaipuitu, Reproductive and Child Health (RCH) chuan nimin khan Aizawl Civil Hospital conference hall-ah kum 2015-16 chhunga an hnathawhte an thlir lêt. Nausen thi zat tehna, Infant Mortality Rate (IMR)-ah Mizoram chu kum 2015-16 chhung khan 22 (nau piang 1,000 zelah 22 an thi)-ah a tlahniam tih an tarlang.

Review meeting hi Health Services director Dr Rohmingthanga Ralte-in a hmanpui a; district hrang hrang aṭangin RCH programme khawihtute an tel. India rama hriselna tehna pawimawh tak, IMR leh raicheha thi zat tehna Maternal Mortality rate (MMR) dinhmun an sawiho a; nu leh nau hriselna bakah, tleirawlte hriselna (adolescent health) leh hri danna (EPI) chungchanga hmalaknate an sawiho bawk.

Dr Rohmingthanga Ralte chuan, nu leh an nau paite hriselna kawnga thawktute inpekna vangin Mizoram IMR a tlahniam tih sawiin, lawmawm a tih thu a sawi a, nasa lehzuala
ṭan la turin thawktute a fuih. Thawktu indaih lohna leh hmanraw lamah ṭan lak zel a nih tur thu sawiin, "Central aṭanga lo kalte pawhin model state ni thei hial turah min ngai a ni," a ti.

RCH-a state programme officer Dr Vanlalsawma'n report a pek danin, kum 2015-16 chhunga Mizoram IMR chu 22 niin, hei hi Mizoram dinhmun ṭhat lai ber a ni a; kum 2014-15 ah chuan IMR hi 37 a ni. MMR chu kum 2015-16 chhung khan 88 (naute hringtu nu 1,00,000 zelah 88 an thi) a ni thung.

Dr Vanlalsawma chuan, IMR tlakhniam chhante chu, Vitamin B1 supplementation mumal zawka pek chhuah a nih vang te, district pali - Aizawl, Lunglei, Saiha leh Lawngtlai district-ah nausen damlo leh bûk zang zualte enkawlna hmun Special Newborn Care Unit (SNCU) nikum kum tîr aṭanga kalpui a nih tâk vangte leh, mipuite hnena zirtirna nasa zawka pek vangte nia a lan thu a sawi. Raicheha thite hi thingtlang kilkhâwra awmte leh thisen tlakchham (anaemia) vang an ni tlangpui tih a sawi bawk.

Meeting-ah hian, IMR tihhniamna tura Pradhan Mantri Surakshit Matritva Abhyan (PMSMA) chu July 2016 aṭangin kalpui ṭan tur a ni a; he scheme hnuaiah hian thingtlanga nu nau pâi, inentir tura hmunpui pan harsate ṭanpui an ni dawn tih tarlan a ni.

RCH review meeting hi vawiinah chhun-zawm a ni ang.