Gas phur truck-te veng turin Legal Metrology hriattir an ni
Food, Civil Supply & Consumer Affairs (FCSCA) minister John Rotluangliana chuan, Mualkhang Gas Bottling Plant aṭanga gas bûr phur ṭhin truck-te chu Aizawl dái thleng veng (escort) turin Legal Metrology hotute a hriattir.
Tun hnaia gas tihchingpen lai Central YMA Kumpuan Committee-te'n an man ṭhin chungchanga sorkar hmalakna thuthar thehdarhtute'n an zawh-naah John Rotluangliana chuan, Legal Metrology hotute chu gas phur truck-te Aizawl dái thleng tal veng ṭhin turin a hriattir a; Legal Metrology hotute chuan truck ven dan tur ngaihtuaha an inkoh khawm nghal tur thu Minister an hrilh.
FCSCA Minister chuan, Central YMA Kumpuan Com-mittee-te'n gas tihchingpen ṭhin chungchanga hma an la chu lawmawm a tih thu sawiin, "CYMA hian sorkar leh mipui min ṭanpui avangin kan lawm tak zet a ni," a ti.
John Rotluangliana chuan, gas tihchingpen chu a reh theihna atan duty an indah ve ṭhin thu sawiin, "Gas a hnianghnâr lai hi duty lamah kan inthlahdah ve deuh ṭhin niin ka hria. Gas a vân lai chuan duty an ngawrh deuh. Chutih rualin, thawktu indaih lohna avangin duh angin duty kan dah thei lo," a ti a; gas tihchingpen tur chu theihtawp chhuaha vên zel an tum thu a sawi.
Gas bûk tling ngei an lei theih nan mipuite'n gas an lak dawnin bûk ṭhin se a duh thu sawiin John Rotluangliana chuan, "Mipui zingah bûk kher ngai ti lo an tam a, hmun ṭhenkhatah chuan bûk tling lo deuh pawh la hreh miah lote an awm. Hun rei deuh pawh ni se, gas tihchingpen a reh theihna atan bûk hun chhung nghâk hram hram turin ka duh a ni," a ti.
FCSCA Minister sawi danin, gas hi bûk tling lo a nih chuan a tlin lohna chin paihin mipuite'n an lei tur a ni. Mipuite'n gas bûk tling lote man tlâwm zawka an lei ṭhin a nih chuan agent-te bûk tling lo an la duh dawn lo a, chuvangin, driver-te'n an gas phurh chu tihchingpen an ngam lo thei dawn a ni.
Hetih lai hian, Legal Metro-logy chuan thuchhuah siamin, mipui hnenah gas bûr a bûk tling lo sem a tam tih hriain kum 2000 hma lam aṭangin hma an lak thu an tarlang a, "Kum 2015 leh 2016 chhungin gas bûr khawih chingpen 4,691 man a ni," an ti.
Legal Metrology chuan, gas distributor-te hnena gas thlengte an bûkpui a, khawih chingpente manin, dan anga an hrem thu sawiin, "Kawng laka gas khawih chingpente vâi a ni a, ṭhahnem tak kan man. A khawih chingpentu driver-te hi dan angin pawisa chawitir an ni a, an khawih chingpen ang hû hisâpa a rihna chu distributor hnenah pawisa pektir an ni," an ti a; gas chu a rihna hisâpin mipuite hnenah an hralh ṭhin thu an sawi.
Legal Metrology tarlan danin, gas bûk tling lo man chhuah sang chuang chu bottling plant-ah distributor-te pek kîrtir a ni tawh.
Gas bûk tling lo man leh endik dan
District Truck Gas bûr Man zat Pawisa
endik zat chawitir
Aizawl 2,448 7,49,088 4,204 Rs. 1,50,000
Serchhip 151 46,206 36 Rs. 3,000
Champhai 162 49,572 99 Rs. 5,500
Kolasib 121 37,026 112 Rs. 12,000
Lunglei 629 1,92,474 177 Rs. 45,000
Saiha 207 63,342 20 Rs. 23,000
Mamit 43 N.A N.A Rs. 4,000
Total 3,718 11,37,708 4,691 Rs 2,42,500