Sikul 60-a naupangte football zirna tur Grassroot football CM-in a hawng

SSA Mission, Mizoram leh Ratan Tata Trust-te thawhhona hnuaia Mizorama sikul 60-a grassroot football academy an din chu, nimin khan chief minister Lal Thanhawla'n Lammualah a hawng.

Chief Minister chuan, sikul 60-a grassroot football dinte hawn a ni ta chu Mizoram tan ni chhinchhiah tlak a nih thu sawiin, a hlawhtlinna tura buaipuitute chungah lawmthu a sawi a, "Hun rei lo te chhungin sport infrastructure-ah kan ṭhang chak hle a, kum riat chhungin infiamna lama zahpuiawm loh takah kan chhuak thei a ni," a ti.

Mizoram chu India ramah football-a hmahruaitu a ni ṭan ta chu ropui a tih thu sawiin, CM Hawla chuan, "Thawhrimna rah a ni a, football hi tunah chuan eizawnna chauh ni loin, ṭhenkhat chuan hausakpui nan an hmang tawh a ni, a ti a; sorkarin a kalpui mek Catch Them Young policy-in rah ṭha a chhuah mek thu a sawi.

Lal Thanhawla chuan, infiamna lamah Mizoramin hmasawnna tur tam tak a la neih thu sawiin, "Role model nih kan tum tur a ni a. Ṭhalaite ei leh ina an fimkhur a, zuk leh hmuam leh ruihhloa an fihlim a, nun an uluk a ngai," a ti a; sport association hruaitute pawh ruih theih thila an fihlim a ngaih thu a sawi. Infiammite leh sport association hruaitute chu ram leh hnam tihmingṭha tura ṭan la turin a chah.

Chief Minister chuan, football chu mipa tan chauh ni loin, hmeichhe tan pawh a ni tih sawiin, "Mipa football-ah chuan India a la hniam a, khawvela lang pha turin kawng a la thui. Hmeichhe football hi khawvela kan lan chhuah theihna tura kawng awlsam zawk a ni," a ti a; nasa zawka football khel turin Mizo hmeichhiate a sáwm.

Mizoramah hockey a lâr tawh lo hle tih a sawi rualin, kumina Brazil-a Rio Olympic-ah hockey-a India team-ah Mizo an tel an la beisei thu leh, hockey-ah ṭan lak thar a ngaih thu a sawi bawk.

Tata Trust associate director Biswanath Sinha chuan, sport chu Tata Trust hmalakna pakhat a nih thu leh Jamshedpur-a Tata Football Academy-ah Mizo naupang eng emaw zatin an zir tawh thu a sawi a, "Mizoram hi India rama football power house a ni tawh a, I-League hnuhnung berah Mizoram aṭangin player 40 chuang an tel a ni. Football-a Mizoram theihna kan hria a, grassroot football academy hmang hian India ramin football-ah hmel thar a hmuh ngei kan beisei," a ti.

Grassroot football hawnnaah hian School Education minister H Rohluna pawhin thu a sawi a; academy naupangte'n show an nei bawk. Inkhawmah hian Sports minister Zodintluanga leh parliamentary secretary (School Education) Joseph Lalhimpuia, MFA hruaitute leh zirlai ṭhahnem tak an tel.

School Education department leh Tata Trust hian October 10, 2013-ah MoU an ziak a. School Education-in project an siam chu Tata Trust hnuaia hmarchhak bial enkawltu North East Initiative Development Agency (NEIDA)-in December 3, 2015-a an pawm hnuah, kumin May thla khan grassroot football kalpui turin MoU ziah leh a ni.

He football zirna hi sorkar sikul leh sorkar aṭanga ṭanpuina dawng sikul 60-ah din a ni tawh a; Aizawl district-ah 14, Lunglei district-ah 12, Champhai district-ah 10, Mamit, Serchhip leh Kolasib district-ah pariat ṭheuh din a ni.

Academy pakhatah naupang 50 zel awmin, academy 60-ah naupang 3,000 an awm. Academy pakhat hi footbal trainer leh assistant trainer-te'n an enkawl a ni.

Naupangte'n football an zirna atana senso zawng zawng, jersey, ball, ballboot, cone, maker leh ṭul dangte chu NEIDA-in an tum vek dawn a. Sum sên zat tura ruahman chu cheng nuai 273 a ni a, chung zinga nuai 167 chu NEIDA-in tumin, nuai 106 chu SSA-in an tum ang.