Champhai district-a phalna nei loa Chêngte hnawtchhuak turin rawt dawn

Champhai District Level Screening Committee chu nimin khan DC conference hall-ah an ṭhukhawm a; an district chhunga sorkar phalna loa mi an chenna hmun chungchang ngaihtuah a ni a, phalna nei loa hmun pahniha awmte chu hnawhchhuah tura rawtna thlen an rel.

Meeting-a tarlan danin, Champhai district-ah hian sorkar phalna loa inbenbelna hmun pathum - Saikhumphai, Tawitawkawn leh Chalrang Melhnih te a awm. Tawitawkawn leh Chalrang Melhnihte chu sub-village pek tura tehfung hrang hrangte an phak loh avangin hnawhchhuah tura rawtna thlen meeting chuan a rel a ni.

Tawitawkawnah hian in 14 a awm a, Chalrang Melhnih-ah in pali a awm thung. Saikhumphai chu Court-a thubuai kal mek a nih avangin a chungchang rêl fel a la ni lo.

Meeting kaihruaitu addl. DC C Lalzarliana chuan, sorkar phalna loa inbenbelna awmin hmasawnna a tih-ṭhuanawp bakah, dan leh thupek kenkawh kawngah harsatna tam tak a thlen ṭhin tih a sawi a; V/C tinte chu an khaw ram chhung ṭheuhah phalna loa inbenbel tumte chu a hma lama hmetmit zung zung turin a chah.

Mizoram sorkar chuan phalna loa inbenbelna hmunte chu sub-village atana tehfung an phak chuan sub-village dinhmun pek emaw, sub-village tehfung phak lote chu hnawhchhuahturin thupek a chhuah a ni.

Sub-village pe tura tehfungte chu - lo neih tur ram khaw bul hnaiah ram zau tak a awm tur a ni a, parent V/C phalna a awm ngei tur a ni. Sorkarin asset a siam tawh - sikul leh thil dangte awm dam enfiah tur niin, in 50 tal a ding ngei tur a ni a, in 50 tling lo pawh a ṭul dan azirin sub-village pek theih an ni. Inbenbelna hmuna cheng mekte eizawnna leh sorkar phal loh thil ṭha lo an ti ṭhin em tih ngun taka enfiah tur a ni bawk.