KHAWTHLIR

ATC Result

Senate of Serampore chuan June 22, 2016 khan Bachelor of Divinity (BD) result a tichhuak a, Aizawl Theological College-a aṭanga BD final year mi 25-te an pass vek. ATC zirlaite hi first class A- ah mi pahnih, second class B+ ah mi pariat, second class B ah mi 13 leh second class B- ah mi pahnih an pass a ni.

Thisen pe

Lungdai Bial KṬP chuan nimin khan Lungdai Koh-hran hall-ah blood donation camp an huaihawt a, Aizawl Civil Hospital tan mipa 49 leh hmeichhia pasarihin thisen unit 56 an pe.

Free clinic

Champhai District Hospital-a Mobile Medical Unit-te chuan June 22, 2016 khan Mualkawiah a thlawna inentirna an buatsaih a; mi 70 chuang an inentir a, enfiah ngaite an enfiah bakah, a thlawnin damdawi an pe.

YMA tel lo

IPR department chuan thuchhuah siamin, June 21-a Lammuala International Yoga Day hmannaah Central YMA an tel ve anga an thuchhuaha an tarlan chu a dik lo tih an tarlang.

Gas sawiho

Aizawl DC chuan nimin khan Aizawl SP, Supply department hotu te, Indian Oil Corporation-a LPG Sales Manager leh LPG distributor-te a pisaah a kokhawm a; gas sem leh hralh chungchang leh LPG subsidy kaihhnawih, mipui tana harsatna thlen thei chungchanga hmalakna mumal leh mipui awlsam zawkna tur an sawiho.

Ruihhlo hal

Excise & Narcotics department-te'n ruihhlo chi hrang hrang an man Rs.13,99,62,981 chuang man chu nimin khan Brigade Field, Bawngkawn-ah Excise minister R Lalzirliana'n a hal ral. Ruihhlo an hal ralte hi Drugs Disposal Committee-in an endik vek hnua hal ral theih an tihte an ni.