CBI chhuitir dawn leh dawn loah Lokayukta-in thutlukna la siam lo
Lokayukta chuan ZPM Vigilance department ngenna anga thubuai pathum Central Bureau of Investigation (CBI) an chhuitir dawn leh dawn loah thutlukna an la siam lo.
Vanglaini palai zawhna chhangin Lokayukta chairman Lalmalsawma chuan, thutlukna an la siam loh thu a sawi a, "Hmanhmawhthlak lutuk loah kan ngai. Dan ang chuan CBI hnena chhuitir hi a rem lohnaah a awm lo. Kan ngaihtuah ang a, thutlukna kan la siam ang. CBI chhuitir leh chhuitir loh chu Lokayukta-in a remtih leh remtih loh a ni mai," a ti.
ZPM Legal department chuan Lokayukta-a complaint thehluh tawh ṭhenkhat chu a kal muang lutuka an ngaih avangin CBI chhuitir tura ngenna July 16, 2024 khan Mizoram Lokayukta Chairman hnenah an thehlut a ni.
ZPM Legal Department-in CBI chhuitir tura an ngennate chu - Chaltlang-Durtlang ropeway leh Sakawrhmuituai tlang skywalk chungchang te, NABARD sum hmanga Mizorama sikul eng emaw zat thawm ṭhat chungchang leh, Lengpui Airport chei ṭhat chungchangte a ni.
Thubuai chi thumte hi CBI chhuitir turin Mizoram sorkarin phalna (consent) an pek a ngai a nih pawhin ZPM kaihhruai Mizoram sorkarin consent a pek nghal ngei a rinawm tih ZPM Legal department hotute chuan an sawi.