Ṭawng pakhat chawi lâr thiam a ṭul - Chief Minister
Chief minister Lalduhoma, Chapchar Kût 2024 Organising Committee chairman chuan nimin khan CMO conference hall-ah Chapchar Kût 2024 souvenir a tlangzarh a; Zo hnahthlakte'n mahni ṭawng ṭheuh kalsan si loa inhriat tawn vek theihna tur ṭawng pakhat chawi lâr thiam a ṭul thu a sawi.
Lalduhoma chuan, international ramri te, state ramri te, hnam hming (nomenclature) thlengin a danglam fo tih sawiin, "Zo fate inrelbawlna pawh a la danglam zel lo ang tih kan sawi thei lo. A ṭha zawnga danglamtir tumin ngaihtuahna pawh kan sêng a, hmathlir zau leh huapzo tak kan nei a ni," a ti.
Chief Minister chuan, "Ṭawng hi hnam min phuar khawmtu a ni a, min tidarhtu pawh a ni thei. Chuvang chuan Zo fate hian mahni ṭawng ṭheuh kalsan chuang loa kan zaa kan inhriattawnna tur ṭawng pakhat kan chawi lâr thiam a ṭul," a ti a; Chapchar Kût chu inunauna tiṭha zawnga huapzo taka kalpui thiam a ngai tih a sawi.
Information & Public Relations department leh Art & Culture department-te chu Zo fate inpumkhat zelna turah mawhphurhna pawimawh tak chelhtute an nih thu sawiin CM chuan, theihtawp chhuah zel turin a chah a ni.
Art & Culture minister C Lalsawivunga, Chapchar Kût Organising co-chairman pawhin thu sawiin, souvenir editorial board thawhrimna fakawm a tih thu a sawi.
Chapchar Kût 2024 souvenir-ah hian Kût thupui 'Zo nun ze mawi - tlawmngaihna' lam hawi thupui hrang hrang Mizo ṭawnga ziah 13 leh sap ṭawnga ziah pali bakah, thlalak leh report hrang hrang a awm a; phek 180-a chhah niin, bu 2,500 siam a ni.