Mizoram BJP kan tlânchhe dawn lo - BJP President
BJP, Mizoram Pradesh president Vanlalhmuaka chuan, Mizorama kut hnathawktute leh loneitute'n hmasawnna tak tak an hmuh loh chuan state hmasawnna tak tak a thlen thei loh thu leh Mizoram tan BJP Mizoram chu an tlanchhiat dawn loh thu a sawi.
Vanlalhmuaka hian nimina BJP pisaa political session-ah thu sawiin, "Mizorama kut hnathawktute leh loneitute hian development tak tak an hmuh loh chuan hmasawnna tak tak a thleng thei lo. Mizoram sorkar hian ṭawngka chauh ni loa kut hnathawka eizawngte a ngaihsak a ngai. Inkalpawhna ṭha central-in min siamsakah chak zawka hma la a, kan thlai tharte mipui hnenah man man zawka kan hralh theih nana thar chhuaktute leh leitute hamṭhatna thleng phak ngaihtuah tel a ngai," a ti.
Mizorama BJP din chhan leh awm chhan sawiin Vanlalhmuaka chuan, "Mizoram leh Mizote tan a nih avangin kan state hmasawnna kawnga kan tih theih awmah BJP Mizoram chu kan tlanchhe dawn lo," a ti a; an din chhan tihhlawhtlinna turin theihtawp an chhuah zel dawn tih a sawi.
Mizoram BJP President chuan, Mizoramah BJP leh Kristianna inmil lo anga miin an ngai ṭhin chu sorkar laipui minister rawn zinte'n mak an tih thu an sawi fo niin a sawi a, "Politics-a inbeihna mai mai a nihzia an sawi ṭhin a, mahse, Mizoram mipui chuan kan hre fiah hlei thei chuang lo. A nawlpui anga kan hriat fiah hunah erawh duh aiin kan tlai mai ang tih hlauhawm tak a ni. Mizoram mipui hian Mizo thuam kan inbel a, kan chhungrilah erawh kan inbel tel lo ang tih a hlauhawm," a ti.