Ruihhlo donaa thawhho dan tur sawiho
Excise & Narcotics minister Lalnghinglova Hmar chuan nimin khan Mamit a tlawh a, DC conference hall-ah sorkar hotute leh khawtlang hruaitute ruihhlo do beihpui thlaknaa thawhho dan tur a sawipui.
Lalnghinglova Hmar chuan, ruihhlo donaah sorkar, kohhran leh khawtlang ṭanrual ṭul thu a sawi a, "Mamit district-ah ruihhlo ti eng emaw zat an awm tih hriat a ni. Engtin nge ruihhlo hi kan do ang a, a ti mekte engtin nge kan enkawl ang a, la ti ve lote engtin nge kan vèn ang tih hi ngaihtuahna tak tak senga kan vei a ngai. Kan hnaivai maia ruihhlo ngaite tana ke kan pên lo a nih chuan thi mai turin kan kalsan a ni," a ti.
Excise Minister chuan, "A theih ang anga thawktute thuam chak te, khawtlang leh kohhran anga thawhhona kalpui leh ruihhlo dona tura mamawh sum leh thil dangah pawh sorkar chuan theihtawp a chhuah zel dawn," a ti a; sorkarin ram leh hnam hmelma ruihhlo do a ngaih pawimawh thu a sawi.
Ṭhutkhawmah hian hmalakna turte sawiho a ni a, Mamit khawpuia kohhran hrang hrangte ṭangrualin ruihhlo ngaite khung khawma enkawl te, sikulah chawlhkar khatah ni khat tal ruihhlo do tura zirtirna neihte an rel.
Excise Minister hian ruihhlo donaa hman turin YMA Sub-Hqrs, Mamit President hnenah Rs 10,000 a hlan a; Mamita Excise & Narcotics Assistant Commissioner hnuaia incentive award dawngtu mi pariat hnenah award a hlan bawk.