Sawiselna zawng zawng huat loh tur - ZPM MLA

ZPM party chuan nimin khan an pisaah chhung inkhawm an hmang a, adviser to chief minister Ginzalala, MLA-in thu sawiin, kut hnathawktute dinchhuahna chu ZPM din chhan a la nih reng thu leh, sawiselna zawng zawng huat tur a nih loh thu a sawi.

Ginzalala chuan, ZPM chuan a din tirh aṭangin Pathian kaihhruaina a dawng nasa hle tih sawiin, "A tir aṭanga tun thleng­­in kut hnathawktute dinchhuahna hi kan din chhan a la ni reng. Pathian zarah rorelna kan chang a, beihna pawh kan tâwk chho ve ta zel a, hengte hi dawn­sawn kan thiam a ngai hle a ni," a ti.

Sawiselna zawng zawng an haw tur a ni lo tih sawiin Ginzalala chuan, "Min beitute hi chi hnih chi thum lai an ni thei a, a ṭhen chu kan party tana ṭhahnemngai tak leh ram hmangaihtu tak takte an ni thei a, hengho hian thil dik ti turin min beisei a, min zilh a ni. Ṭhenkhat erawh chu min ertu leh min hawtute an ni thei a, a dawnsawn danah ringtu kan ni tih hre reng ila, Isua zirtirna hre rengin ringtu kan nihna kan lantir zel a pawimawh," a ti a; sawiselnate chu insiamṭhatna hman­ruaa hman thiam a ngaih thu a sawi.

Adviser to CM chuan, ZPM policy laimu chu sustainable development (hmasawnna tlo leh tluantling) a nih thu sawiin, "Mimal hnena pawisa leh therhlo tlemtê tê insem hi a sustainable lo. Bung thar kai turin kan inbuatsaih a, party mi leh sate pawh kalphung thar kan au pui ang ngeiin kan intihthianghlim a ngai. Engkim hi vawi leh khatah a thar vek thei lo tih hre chiangtu kan ni a, min beitute'n engkim thar nghal vek turin an beisei a, hengte hi politics ruihchilhte an ni," a ti.